يزرايلدە مىڭداعان ادام تۇتقىنداردى بوساتۋدى تالاپ ەتىپ، نارازىلىق ءبىلدىردى
استانا. KAZINFORM - تەل-اۆيۆتە يزرايل بيلىگى مەن الەمدىك كوشباسشىلاردان تۇتقىنداردى كەز كەلگەن باعامەن بوساتۋدى تالاپ ەتكەن اۋقىمدى اكسيا ءوتتى، دەپ حابارلادى DW.
اكسياعا قاتىسقاندار سانى تۋرالى ءارتۇرلى اقپارات كوزدەرى ءارقالاي مالىمەت بەرەدى: AFP اگەنتتىگى شامامەن 60 مىڭ ادام جينالدى دەسە، The Times of Israel باسىلىمى شامامەن 10 مىڭ ادام دەپ جازادى.
ميتينگ تەل-اۆيۆ كوركەمسۋرەت مۋزەيى جانىنداعى ۇلكەن الاڭدا ءوتتى. بۇل جەر «تۇتقىندار الاڭى» دەپ اتالىپ كەتكەن. اكسيانى ۇيىمداستىرۋعا سەبەپ بولعان جايت - حاماس پەن ونىمەن وداقتاس «يسلامدىق جيھاد» ۇيىمىنىڭ يزرايلدىك تۇتقىندار ەۆياتار داۆيد پەن روم براسلاۆسكيدىڭ ۆيدەولارىن جاريالاۋى. ۆيدەودا ەكەۋى دە ابدەن السىرەپ، شارشاعان كۇيدە كورىنەدى. داۆيد ۆيدەودا ءوزىن «گازا سەكتورىنداعى تۋننەلدە ءوز قابىرىن قازىپ جاتىرمىن» دەپ قورقادى.
ميتينگتە ءسوز سويلەگەن ەۆياتاردىڭ اعاسى يلاي حاماس-تى تۇتقىنداردى «اشتىق ارقىلى ازاپتاۋدىڭ ءتىرى تاجىريبەسى» رەتىندە پايدالانۋدا دەپ ايىپتاپ، داۆيد پەن باسقا تۇتقىندارعا گازا سەكتورىنا جىبەرىلەتىن گۋمانيتارلىق كومەكتىڭ جەتكىزىلۋىن تالاپ ەتتى.
- ولاردىڭ قازىرگى سۇمدىق جاعدايدا ءومىر سۇرۋىنە بىرنەشە كۇن عانا قالعان بولۋى مۇمكىن، - دەدى يلاي.
روم براسلاۆسكيدىڭ اكەسى وفەر يزرايل ۇكىمەتىن ۇلىنا كومەك كورسەتپەي، ونى تاعدىر تالكەگىنە تاستاپ قويعانى ءۇشىن سىنعا الدى. ونىڭ ايتۋىنشا، بۇل جاعداي 666 كۇننەن بەرى جالعاسىپ كەلەدى.
- مەن ۇلىمدى كوردىم، ءبىراق ونى تاني المادىم. مەنىڭ ۇلىم روم اشتىق پەن شولدەن قينالىپ كەتتى، ول فيزيكالىق تۇرعىدان السىرەگەن، رۋحاني جاعىنان كۇيرەگەن. مەنىڭ بالام ءولىپ بارا جاتىر، - دەدى ول.
ول يزرايل پرەمەر-ءمينيسترى بينيامين نەتانياحۋدى سوعىستى توقتاتۋ جانە بارلىق تۇتقىنداردى بوساتۋ جونىندە جان-جاقتى كەلىسىمگە قول جەتكىزۋگە شاقىردى.
- بولەك-بولەك كەلىسىمدەر جاساۋ ستراتەگياسى ءساتسىز بولدى، - دەدى تۇتقىننىڭ اكەسى.
تۇتقىنداردىڭ تۋىستارى ترامپتىڭ وكىلىمەن كەزدەستى
ا ق ش پرەزيدەنتىنىڭ تاياۋ شىعىس جونىندەگى ارنايى وكىلى ستيۆەن ۋيتكوفف ميتينگ كەزىندە «تۇتقىندار الاڭىنا» كەلدى. ونى قاتىسۋشىلار قوشەمەتپەن، «ولاردى دەرەۋ ۇيگە قايتارىڭدار!» دەگەن ۇراندارمەن قارسى الدى، دەپ جازادى AFP.
ترامپتىڭ وكىلى ۆاشينگتوننىڭ حاماس-پەن جاسالعان جەكە-جەكە كەلىسىمدەرگە كوڭىلى تولمايتىنىن جانە ەندى گازا سەكتورىنداعى قاقتىعىستاردى توقتاتۋ مەن بارلىق تۇتقىنداردى بوساتۋدى كوزدەيتىن جان-جاقتى كەلىسىمگە ۇمتىلىپ وتىرعانىن ايتتى.
كەيىن ۋيتكوفف كورشى عيماراتتا تۇتقىنداردىڭ تۋىستارىمەن كەزدەستى. The Times of Israel باسىلىمىنىڭ جازۋىنشا، تۇتقىندار وتباسىلارىنىڭ فورۋمى وسى كەزدەسۋدەن كەيىن ۋيتكوففتىڭ «جەكە ءوزى جانە ترامپپەن بىرگە» پالەستينالىق سودىرلار قولىندا قالعان يزرايلدىكتەردى بوساتۋعا كۇش سالۋعا ۋادە بەرگەنىن حابارلادى.
بۇعان دەيىن حاماس گازا سەكتورىنداعى گۋمانيتارلىق بلوكادا الىنبايىنشا كەلىسسوزدەر جۇرگىزۋدەن باس تارتقان بولاتىن.
