يزرايل يرانمەن اتىستى توقتاتۋعا كەلىستى، ءبىراق شارت بۇزىلسا قاتاڭ جاۋاپ بەرەتىنىن ەسكەرتتى

استانا. KAZINFORM - يزرايل ا ق ش- تىڭ يرانمەن ەكىجاقتى اتىستى توقتاتۋ تۋرالى ۇسىنىسىنا كەلىستى. الايدا كەلىسىم شارتى بۇزىلعان جاعدايدا جەدەل ءارى قاتاڭ جاۋاپ بەرىلەتىنىن ەسكەرتتى.

 بۇل تۋرالى سەيسەنبى كۇنى تاڭەرتەڭ جاريالانعان پرەمەر-مينيستر كەڭسەسىنىڭ مالىمدەمەسىندە ايتىلعان، دەپ حاارلايدى Kazinform مەنشىكتى ءتىلشىسى.

پرەمەر- مينيستر بينيامين نەتانياحۋ قورعانىس ءمينيسترى، يزرايل قورعانىس ارمياسى (س ا ح ا ل) باس شتابىنىڭ باستىعى جانە «موسساد» بارلاۋ قىزمەتىنىڭ باسشىسىمەن جينالىس وتكىزىپ، «قايسار ارىستان» وپەراتسياسى اياسىنداعى بارلىق اسكەري مىندەتتەردىڭ ورىندالعانىن جانە ودان دا اۋقىمدى ناتيجەلەرگە قول جەتكىزىلگەنىن حابارلادى.

- يزرايل قوس ەكزيستەنتسيالىق قاتەردى - يادرولىق جانە بالليستيكالىق زىمىراندار سالاسىنداعى قاۋىپتەردى جويدى، - دەلىنگەن رەسمي مالىمدەمەدە.

اقپاراتقا سايكەس، س ا ح ال تەگەران ۇستىندەگى اۋە كەڭىستىگىندە تولىق ۇستەمدىك ورناتىپ، يراننىڭ اسكەري باسشىلىعىنا سوققى جاساپ، رەجيمگە تيەسىلى ونداعان ماڭىزدى نىساندى جويعان. سونىمەن قاتار يزرايل يراننىڭ جوعارى لاۋازىمدى يادرولىق فيزيگىن جويعانىن العاش رەت رەسمي تۇردە مالىمدەدى.

مالىمدەمە كەيىنگى تاۋلىكتەردە «باسيدج» (ييرسق قۇرامىنا كىرەتىن ەرىكتى قاۋىپسىزدىك كۇشتەرى) ۇيىمىنىڭ جۇزدەگەن مۇشەسىنىڭ كوزى جويىلىپ، يران استاناسىنداعى شەشىم قابىلداۋ ورتالىعىنا سوققى جاسالعانىن ايتىلعان.

- يزرايل يادرولىق قاۋىپتىڭ جويىلۋىنا قولداۋ كورسەتكەنى ءۇشىن ا ق ش پرەزيدەنتى دونالد ترامپ پەن امەريكا قۇراما شتاتتارىنا العىس بىلدىرەدى، - دەپ كورسەتىلگەن قۇجاتتا.

س ا ح ا ل وكىلى، بريگادالىق گەنەرال ەفي دەفرين يزرايل ارمياسىنىڭ بارلىق قويىلعان ماقساتتارعا قول جەتكىزگەنىن، الايدا ىلعي دايىندىقتا بولاتىنىن اتاپ ءوتتى.

- باس شتاب باستىعى اتىستى توقتاتۋ شارتتارى بۇزىلعان جاعدايدا دەرەۋ جاۋاپ بەرۋگە تولىق دايىن بولۋدى تاپسىردى، - دەدى ول.

پرەمەر- مينيستر كەڭسەسى ازاماتتاردى جاعداي تولىق تۇراقتالعانعا دەيىن تىل باسقارماسىنىڭ نۇسقاۋلارىن ساقتاۋعا شاقىردى. بينيامين نەتانياحۋ الداعى ۋاقىتتا مالىمدەمە جاساۋى ىقتيمال.

دۇيسەنبى كۇنى ا ق ش پرەزيدەنتى دونالد ترامپ يزرايل مەن يران اراسىنداعى اتىستىڭ تولىق توقتاتىلعانىن جاريالاعان بولاتىن.

ال يران يزرايلمەن اتىستى توقتاتۋ رەجيمى كۇشىنە ەنگەنىن مالىمدەدى.