يزرايل يرانعا سوققى بەرىپ، اۋە كەڭىستىگىن جاۋىپ تاستادى
استانا. قازاقپارات - 13-ماۋسىمعا قاراعان ءتۇنى يزرايلدىڭ ءا ءا ك (اسكەري-اۋە كۇشتەرى) يرانعا سوققى جاسادى. تەگەراندا جارىلىستاردىڭ دىبىسى ەستىلدى. يزرايل توتەنشە جاعداي رەجيمىن جاريالاپ، ءوزىنىڭ اۋە كەڭىستىگىن جاپتى، دەپ جازدى DW.
يزرايلدىڭ قورعانىس ءمينيسترى يسراەل كاتستىڭ ايتۋىنشا، بۇل «الدىن الۋ سوققىسى» بولعانىن Reuters اگەنتتىگى حابارلادى. AFP اگەنتتىگىنىڭ مالىمەتىنشە، يزرايل ەلدە توتەنشە جاعداي رەجيمىن ەنگىزدى.
- يزرايل مەملەكەتى يرانعا الدىن الا سوققى جاساعاننان كەيىن، جاقىن ارادا يزرايلگە مەن ونىڭ بەيبىت تۇرعىندارىنا زىمىران سونداي-اق درون شابۋىلدارى جاسالادى دەپ بولجانىپ وتىر، - دەدى كاتس The Times of Israel باسىلىمىنا بەرگەن سۇحباتىندا.
يراننىڭ مەملەكەتتىك تەلەديدارى حابارلاعانداي، «تەگەران استاناسىنىڭ ءارتۇرلى بولىكتەرىندە قاتتى جارىلىستاردىڭ دىبىسى ەستىلدى». سونداي-اق، يراننىڭ اۋە قورعانىس جۇيەسى تولىق جاۋىنگەرلىك دايىندىققا كەلتىرىلگەنى جانە يمام حومەيني اتىنداعى حالىقارالىق اۋەجايدا بارلىق قاتىناس توقتاتىلعانى حابارلاندى.
يزرايل دە ءوز اۋە كەڭىستىگىن جاپتى.
يزرايلدىڭ قورعانىس ارمياسى (ساحال) يراننىڭ يادرولىق باعدارلاماسىنا قارسى «ارىستان حالقى» كودتىق اتاۋىمەن وپەراتسيا باستاعانىن راستادى.
The Times of Israel مالىمەتىنشە، تھساحال يراندا بىرنەشە كۇن ىشىندە 15 يادرولىق بومبا جاساۋعا جەتەتىن بايىتىلعان ۋران بار ەكەنىن ايتىپ، بۇل «اسا قاۋىپتى قاۋىپكە» قارسى شارا قولدانۋعا ءماجبۇر ەكەنىن مالىمدەدى.
يزرايل يرانداعى ونداعان نىسانعا سوققى جاسادى
يزرايلدىڭ ءا ءا ك يران اۋماعىنداعى يادرولىق باعدارلاماعا جانە باسقا دا اسكەري نىساندارعا بايلانىستى ونداعان نىساندى سوققىعا الدى. Reuters اگەنتتىگى حابارلاعانداي، جارىلىستاردىڭ دىبىسى ناتانز قالاسىنداعى يراننىڭ يادرولىق نىسانى ماڭىندا دا ەستىلگەن.
- يراننىڭ يادرولىق وتىندى بايىتۋ باعدارلاماسىنىڭ ءدال وزەگىنە سوققى جاسادىق. سونىمەن قاتار، ءبىز يراننىڭ بالليستيكالىق زىمىران باعدارلاماسىنىڭ ورتالىعىنا دا سوققى بەردىك. يراننىڭ بىزگە زيان كەلتىرۋ مۇمكىندىگى ءالى دە بار. وپەراتسيا قاجەتتى بولعانشا جالعاسادى - دەدى يزرايل پرەمەر-ءمينيسترى بينيامين نەتانياحۋ.
اقپارات اگەنتتىكتەرىنىڭ (سونىڭ ىشىندە Reuters) حابارلاۋىنشا، يزرايلدىڭ ءا ءا ك يرانداعى يادرولىق جانە اسكەري نىسانداردان بولەك، يسلام رەسپۋبليكاسىنىڭ اسكەري جانە عىلىمي باسشىلىعىنا باعىتتالعان نۇكتەلىك سوققىلار جاساعان. اتاپ ايتقاندا، يسلام رەۆوليۋسياسى ساقشىلار كورپۋسىنىڭ (ك س ي ر) شتاب باستىعى حوسسەين سالامي مەن يادرولىق فيزيكتەر فەرەيدۋن ابباسي-داۆاني مەن موحامماد مەحدي تەحرانچيدىڭ قازا تاپقانى تۋرالى حابارلاندى.
ەسكە سالا كەتەيىك، بۇعان دەيىن يزرايل يەمەننىڭ حودەيدا پورتىنا سوققى بەرگەنىن جازعان ەدىك.
