يزرايل تاريحىنداعى ەڭ قىمبات سوعىس: شىعىن كولەمى 3 ميلليارد دوللار
استانا. KAZINFORM - يزرايل يرانمەن اراداعى قاقتىعىس كەزىندە كەلگەن زالالدى 10 ميلليارد شەكەل (شامامەن 3 ميلليارد ا ق ش دوللارى) دەپ باعالادى. بۇل سوما قولدانىلعان قارۋ-جاراق پەن اۋە شابۋىلىنان قورعانىس جۇيەلەرىن اۋىستىرۋ شىعىندارىن قامتىمايتىنىن ەسكەرگەن ءجون، دەپ جازدى DW.
بۇل باعالاۋ راكەتا سوققىلارىنان بۇلىنگەن عيماراتتاردى قالپىنا كەلتىرۋ مەن جەرگىلىكتى بيزنەسكە وتەماقى تولەۋ ءۇشىن قاجەت قارجىعا نەگىزدەلگەن. بۇل تۋرالى 26 -ماۋسىم كۇنى Bloomberg اگەنتتىگى يزرايلدىڭ قارجى مينيسترلىگى مەن سالىق قىزمەتىنە سىلتەمە جاساپ حابارلادى.
- بۇل - ءبىز بەتپە-بەت كەلگەن ەڭ اۋىر ماسەلەلەردىڭ ءبىرى. يزرايل تاريحىندا مۇنداي اۋقىمدى قيراۋ بولعان ەمەس، - دەدى وتەماقى تولەۋگە جاۋاپتى سالىق قىزمەتىنىڭ باسشىسى شاي اارونوۆيچ.
اتالعان باعاعا پايدالانىلعان قارۋ مەن اۋە شابۋىلىنان قورعانۋ جۇيەلەرىن جاڭارتۋعا كەتەتىن شىعىندار كىرمەگەن. سوندىقتان جالپى زالال كولەمى بۇدان الدەقايدا كوپ بولۋى مۇمكىن. قارجى ءمينيسترى بەسالەل سموتريچ سوعىسقا كەتەتىن جالپى شىعىن 12 ميلليارد دوللارعا جەتۋى مۇمكىن دەپ مالىمدەدى. ال يزرايل ۇلتتىق بانكىنىڭ باسشىسى امير يارون Bloomberg TV ارناسىنا بەرگەن سۇحباتىندا شامامەن 6 ميلليارد دوللار دەپ نەعۇرلىم ۇستامدى باعا ۇسىندى.
ەكونوميكاعا تونگەن قاۋىپ
يزرايل ەكونوميكاسى سوڭعى 20 ايدان بەرى ايماقتىق قاقتىعىستىڭ قىسىمىندا. بۇل جاعداي حاماس-تىڭ تەرروريستىك شابۋىلىنان كەيىن ۋشىعىپ كەتكەن. ەلدىڭ ورتالىق بانكى وسى جىلى ءى ج ءو %3,5- عا وسەدى دەپ بولجاعان بولاتىن، الايدا قازىرگى احۋال بۇل بولجامدى قايتا قاراۋعا ماجبۇرلەپ وتىر.
يزرايل بيلىگىنىڭ ايتۋىنشا، يرانمەن اراداعى سوعىس بۇرىنعى قاقتىعىستارمەن سالىستىرعاندا الدەقايدا قىمباتقا ءتۇستى. بۇعان باستى سەبەپ - زىمىران سوققىلارىنىڭ سيپاتى مەن نىساندارى. بۇرىن سوققىلار سيرەك قونىستانعان اۋىلدىق وڭىرلەرگە باعىتتالسا، بۇل جولى تەل-اۆيۆ اگلومەراتسياسى سەكىلدى حالقى تىعىز ورنالاسقان ورتالىق قالالار تىكەلەي نىساناعا الىندى. بۇل اۋماقتا يزرايل حالقىنىڭ جارتىسىنا جۋىعى تۇرادى.
سونىمەن قاتار، يراندىق زىمىراندار وتە قۋاتتى بولعان. كوپشىلىگى 500 ك گ- نان استام جارىلعىش زاتتار مەن جارقىنشاق سناريادتارىمەن جابدىقتالعان. يزرايلدىڭ مالىمەتىنشە، سوعىسقا دەيىن يراندا وسىنداي 2000- 2500 زىمىران بولعان، قازىر سونىڭ جارتىسىنا جۋىعى ساقتالىپ قالعان.
شابۋىلدار ناتيجەسىندە قيراتىلعان نەگىزگى نىسانداردىڭ قاتارىندا:
يزرايلدەگى ءىرى عىلىمي مەكەمەلەردىڭ ءبىرى - ۆەيتسمان ينستيتۋتى، حايفاداعى ەڭ ءىرى مۇناي وڭدەۋ زاۋىتى، وڭتۇستىكتەگى اۋرۋحانالاردىڭ ءبىرى بار.
يزرايل مەن يران اراسىنداعى اۋە شابۋىلدارى 13- ماۋسىمدا باستالدى. سول كۇنى يزرايل يرانعا دروندار مەن زىمىرانداردىڭ العاشقى تولقىنىن جىبەردى. شابۋىلدار ەكى اپتاعا جۋىق جالعاسىپ، تەك 24 -ماۋسىم كۇنى تاڭەرتەڭ ا ق ش پرەزيدەنتى دونالد ترامپ ءبىتىم تۋرالى جاريالاعاننان كەيىن توقتادى.
يزرايل تاراپىنىڭ مالىمەتىنشە:
قاقتىعىس سالدارىنان 28 ادام قازا تاۋىپ، 1300 دەن استامى جاراقات العان.
ال يران بيلىگى 627 ادامنىڭ مەرت بولعانىن حابارلادى.
قاقتىعىس كەزىندە يزرايل ەكونوميكاسى دەرلىك توقتاپ قالدى: مەكتەپتەر مەن كوپتەگەن كاسىپورىندار (ومىرلىك ماڭىزى بارلاردان باسقا) جابىلدى. قارجى مينيسترلىگىنىڭ ەسەبىنشە، بيزنەستى قولداۋعا قاجەتتى وتەماقى 5 ميلليارد شەكەلگە جەتۋى مۇمكىن. بۇل - 2023 -جىلدىڭ قازانىنان بەرى حاماس پەن ليۆانداعى «حەزبوللا» توبىنىڭ شابۋىلدارى سالدارىنان تولەنگەن وتەماقىلار كولەمىنەن ەكى ەسە كوپ.
ەسكە سالا كەتەيىك، بۇعان دەيىن يراننىڭ جوعارعى كوشباسشىسى اياتوللا ءالي حامەنەي تەلەۇندەۋىندە يزرايل مەن وڭىردەگى امەريكالىق بازاعا جاسالعان سوققىلاردى ءوزىن-ءوزى قورعاۋ ارەكەتى دەپ باعالاپ، ا ق ش- تىڭ بەرىلۋ تۋرالى ۇندەۋىن قاتاڭ ايىپتاعان بولاتىن.
ال ترامپ نەتانياحۋدى سوتتان قورعاپ، وعان كەشىرىم جاساۋعا شاقىردى.
