يزرايل قازاقستاندا سۋ قويمالارىنىڭ قۇرىلىسىنا ينۆەستيتسيا سالۋعا نيەتتى

استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ يزرايلدىڭ ءىرى كومپانيالارىمەن كەلىسسوز جۇرگىزدى. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ Value LBH كومپانياسىنىڭ باسقارۋشى سەرىكتەسى جانە Dan Capital ينۆەستيتسيالىق كومپانياسىنىڭ باسقارما ءتوراعاسى شيمون بەن حامو باستاعان سۋ رەسۋرستارىن باسقارۋ سالاسىنداعى جەتەكشى يزرايلدىك كومپانيالاردىڭ كونسورتسيۋمىمەن كەزدەستى.

«تاراپتار سۋ سالاسىنىڭ ءتۇرلى باعىتتارى بويىنشا ىنتىماقتاستىق مۇمكىندىكتەرىن تالقىلادى. اتاپ ايتقاندا، سۋ شارۋاشىلىعى نىساندارىن سالۋ جانە رەكونسترۋكتسيالاۋ، بىرلەسىپ كادر دايارلاۋ جونىندە سويلەستى»، - دەلىنگەن حابارلامادا.

يزرايلدىك بيزنەسمەندەر قازاقستاندا سۋ قويمالارىن سالۋ جانە رەكونسترۋكتسيالاۋ جۇمىستارىنا ينۆەستور رەتىندە قاتىسۋعا دايىن ەكەندىكتەرىن ءبىلدىردى. بۇدان بولەك، يزرايل كومپانيالارى سۋ تاسقىنىن بولجاۋ جانە ودان قورعانۋدىڭ زاماناۋي جۇيەلەرىن ۇسىنۋعا دايىن.

سونىمەن قاتار، تاراپتار سۋ ۇنەمدەۋ تەحنولوگيالارىن ەنگىزۋ، سۋدى تازارتۋ جانە قايتا پايدالانۋ، اۋىز سۋدىڭ ساپاسىن باقىلاۋ، سۋ رەسۋرستارىن ءبولۋ مەن ەسەپكە الۋدى اۆتوماتتاندىرۋ ماسەلەلەرى بويىنشا دا سەرىكتەستىك ورناتۋ جونىندە اڭگىمەلەستى.

نۇرجان نۇرجىگىتوۆ كادر دايارلاۋ ماسەلەسىنە جەكە توقتالىپ، ەلىمىزدەگى سۋ شارۋاشىلىعى ماماندارىنىڭ بىلىكتىلىگىن ارتتىرۋ بويىنشا بىرلەسكەن باعدارلاما ازىرلەۋ جونىندە باستاما كوتەردى. سونداي-اق، جوسپارلانعان جوبالار بويىنشا جۇمىس توبىن قۇرۋدى ۇسىندى.

«ءبىز ناتيجەلى ىنتىماقتاستىققا نيەتتىمىز. يزرايلدىك كومپانيالاردىڭ سۋدى ساپالى باسقارۋدا مول تاجىريبەسى مەن زاماناۋي تەحنولوگيالارى بار. كەيبىر كومپانيالار قازاقستاندا بۇرىننان بەرى تابىستى جۇمىس ىستەپ كەلەدى. ءبىز بارلىق سالادا سۋدى بارىنشا ءتيىمدى پايدالانۋعا نيەتتىمىز، سوندىقتان سەرىكتەستىگىمىز ءوزارا ءتيىمدى بولاتىنىنا سەنىمىمىز مول»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

اۆتور

باقىتگۇل اباي قىزى