يزرايل مەن حاماس اراسىنداعى كەلىسسوزدەر ءساتسىز اياقتالدى
استانا. Kazinform - كايردە يزرايل مەن حاماس اراسىندا گازا سەكتورىنداعى اتىستى توقتاتۋ تۋرالى كەلىسسوزدەر ءساتسىز اياقتالدى. بۇل تۋرالى بۇگىن، 26-تامىزدا مىسىردىڭ بارلاۋ قىزمەتتەرىندەگى دەرەككوزدەرگە سىلتەمە جاساپ، «رەۋتەرس» اگەنتتىگى حابارلادى، دەپ جازادى DW.
حابارعا سايكەس، كەشە، 25-تامىزدا مىسىر استاناسىندا وتكەن كەلىسسوزدەردە يزرايل مەن حاماس مەدياتورلار ۇسىنعان بارلىق ىمىراشىل شەشىمدەردەن باس تارتقان.
سونىمەن بىرگە، امەريكالىق جوعارى لاۋازىمدى شەنەۋنىك كەلىسسوزدەر كونسترۋكتيۆتى وتكەنىن، تاراپتاردىڭ «تۇپكىلىكتى جانە شىنايى كەلىسىمگە» كەلۋگە ۇمتىلىسىن كورسەتكەنىن ايتتى. سونداي-اق، ول قالعان ماسەلەلەردى شەشۋ جۇمىستارى الداعى كۇندەرى جالعاساتىنىن، جۇمىس توپتارى كايردە قالاتىنىن ايتتى.
يزرايل مەن حاماس اراسىنداعى اتىستى توقتاتۋ جانە كەپىلگە الىنعانداردى بوساتۋ تۋرالى كەلىسسوزدەر تسرۋ ديرەكتورى ۋيليام بەرنس، كاتار پرەمەر-ءمينيسترى مۇحاممەد بەن ابدۋلراحمان ءال تاني جانە مىسىردىڭ جوعارى لاۋازىمدى شەنەۋنىكتەرىنىڭ قاتىسۋىمەن ءوتتى.
كەلىسسوزدەر ءساتسىز اياقتالدى دەگەن اقپارات تاراعان كەزدە ا ق ش قورعانىس ءمينيسترى للويد وستين ايماقتاعى ەكى اۋە كەمەسىندەگى سوققى بەرۋ توبىنىڭ بولۋ مەرزىمىن ۇزارتۋعا بۇيرىق بەردى. ول ءوز شەشىمىن يزرايل قورعانىس ءمينيسترى يواۆ گالانتپەن تەلەفون ارقىلى سويلەسكەن كەزدە مالىمدەدى.
- مينيستر يزرايلدىڭ ءوزىن-ءوزى قورعاۋ قۇقىعىن راستادى جانە ا ق ش- تىڭ يران مەن ونىڭ ايماقتىق وداقتاستارىنا قارسى قورعانىسىن قولدادى. وسى قولداۋدىڭ ءبىر بولىگى رەتىندە ول ايماقتا ەكى تاسىمالداۋشى-ەرەۋىل توبىن قالدىرۋعا بۇيرىق بەردى،- دەلىنگەن پەنتاگوننىڭ مالىمدەمەسىندە.
