يزرايل شابۋىلى كەزىندە يران پرەزيدەنتى زارداپ شەكتى
استانا. KAZINFORM - يراندىق اقپارات قۇرالدارىنىڭ حابارلاۋىنشا، ەل پرەزيدەنتى ماسۋد پەزەشكيان يزرايلدىڭ اۋە شابۋىلى سالدارىنان قازا تابا جازدادى، دەپ حابارلايدى BILD.
Fars اگەنتتىگىنىڭ مالىمەتىنشە، سوعىس باستالعاننان ءۇش كۇن وتكەن سوڭ، 16-ماۋسىم كۇنى يزرايل اسكەري-اۋە كۇشتەرى يراننىڭ ۇلتتىق قاۋىپسىزدىك جونىندەگى جوعارعى كەڭەسىمەن بايلانىستى نىسانعا اۋە سوققىسىن جاساعان.
بومبالاۋدان كەيىن عيماراتتاعى ەلەكتر جارىعى ءوشىپ، سول ساتتە جينالىس وتكىزىپ جاتقان ادامدار، ونىڭ ىشىندە پرەزيدەنت پەزەشكيان دا شۇعىل تۇردە ەۆاكۋاتسيالانعان. بىرنەشە ادام، سونىڭ ىشىندە يران پرەزيدەنتى دە اياقتان جاراقات العان.
پەزەشكياننىڭ ءوزى بۇل وقيعانى يراندىق ارنايى قىزمەتتەردەن اقپاراتتىڭ سىرتقا شىعۋىمەن بايلانىستىرۋى مۇمكىن ەكەنىن ايتقان. Fars اگەنتتىگى شابۋىلعا قاتىستى يران ىشىندە «جىبەرىلگەن اگەنت» نۇسقاسى دا تالقىلانىپ جاتقانىن حابارلادى.
يراندىق ب ا ق-تا شابۋىلدان كەيىنگى كورىنىس بەينەلەنگەن ۆيدەو جاريالاندى. كادرلاردا تەگەراننىڭ باتىس بولىگىندەگى تاۋ باۋرايىنا جاسالعان سوققىلار كورسەتىلگەن - ءدال سول جەردە شابۋىلعا ۇشىراعان كەشەن ورنالاسقان. يزرايل تاراپى بۇل وقيعاعا قاتىستى ازىرگە رەسمي مالىمدەمە جاساعان جوق.
