يزرايل داماسكىدەگى پرەزيدەنت سارايىنا اۋە سوققىسىن جاسادى

استانا. KAZINFORM - يزرايل اسكەري-اۋە كۇشتەرىنىڭ ۇشاقتارى سيريا استاناسى داماسكىدە ورنالاسقان پرەزيدەنتتىك كەشەنگە اۋە شابۋىلىن جاسادى. بۇل تۋرالى انادولۋ اگەنتتىگى حابارلادى.

يزرايل اۋە كۇشتەرى الدىمەن سيريانىڭ باس شتاب عيماراتىنا ءۇش مارتە اۋە سوققىسىن جاساپ، كەيىن پرەزيدەنتتىك كەشەنگە شابۋىلداعان.

باس شتاب عيماراتىنان العاشقىدا جالىن كوتەرىلىپ، ارتىنان قويۋ ءتۇتىن شىققانى بايقالعان.

يزرايل ارمياسىنىڭ باسپا ءسوز قىزمەتى اۋە سوققىسى داماسكىدەگى باس شتاب عيماراتىنىڭ كىرەبەرىسىنە باعىتتالعانىن راستادى. شابۋىلدى ۇيىمداستىرۋعا سەبەپ رەتىندە سۋۆەيدا ايماعىنداعى وقيعالار اتالدى. بۇل ايماقتا نەگىزىنەن درۋزى حالقى شوعىرلانعان.

يزرايل ارمياسى بۇعان دەيىن سيريانىڭ وڭتۇستىگىندەگى جاعدايدى باقىلاپ وتىرعانىن، وندا درۋزى قاۋىمىنىڭ بەلسەندىلىگى مەن سيريا اكىمشىلىگىنىڭ ارەكەتتەرىنە نازار اۋدارىلعانىن مالىمدەگەن ەدى.

- يزرايل بۇل ايماقتى باقىلاۋدا ۇستاپ وتىر جانە ساياسي باسشىلىقتىڭ نۇسقاۋلارىنا ساي ءتۇرلى سەناريلەرگە دايىندالۋدا، - دەلىنگەن ارميا حابارلاماسىندا.

ايتا كەتەيىك، بۇعان دەيىن يزرايل اسكەرى گازا سەكتورىنداعى حان-يۋنۋس قالاسىنىڭ ماڭىندا «ماگەن وز» دەپ اتالاتىن جاڭا قۇرلىق ءدالىزى ارقىلى باقىلاۋ ورناتقانى حابارلاندى.