يزرايل «ءال-جازيرا» تەلەارناسىنىڭ كەڭسەلەرىن جاۋىپ تاستادى

استانا. KAZINFORM - يزرايل بيلىگى ەلدەگى Al Jazeera تەلەارناسىنىڭ كەڭسەلەرىن جابۋ تۋرالى شەشىم قابىلدادى. ول تەلەارنانى ارانداتۋشى دەپ اتادى، دەپ جازادى Euronews.

يزرايل ۇكىمەتى كاتارعا تيەسىلى Al Jazeera تەلەراديوكومپانياسىنىڭ جەرگىلىكتى كەڭسەلەرىن جابۋعا ءبىراۋىزدان داۋىس بەردى.

پرەمەر-مينيستر بينيامين نەتانياحۋ بۇل شەشىمىن X پلاتفورماسىندا جاريالادى، ءبىراق بۇل قادامنىڭ ارناعا اسەرى، قاشان كۇشىنە ەنەتىنى جانە شارانىڭ تۇراقتى نەمەسە ۋاقىتشا ەكەندىگى بەلگىسىز.

يزرايلدىك ب ا ق داۋىس بەرۋ يزرايلگە ەلدەگى ارنانىڭ جۇمىسىن 45 كۇنگە توقتاتۋعا مۇمكىندىك بەرەتىنىن حابارلادى.

«مەن باسقاراتىن ۇكىمەت ءبىراۋىزدان «ءال- جازيرا» ارانداتۋشىلىق ارناسىن يزرايلدە جابۋ تۋرالى شەشىم قابىلدادى»، - دەپ جازدى نەتانياحۋ X الەۋمەتتىك جەلىسىندە.

ءال-جازيرا يزرايلگە قارسى ۇگىت-ناسيحات جۇمىستارىن جۇرگىزىپ جاتقانىن ءۇزىلدى-كەسىلدى جوققا شىعاردى.

Al Jazeera - سوعىس بويى گازاداعى اۋە شابۋىلدارى مەن اۋرۋحانالاردىڭ قاندى كورىنىستەرىن تاراتىپ، يزرايلدى حالىقتى جاپپاي قىرعانى ءۇشىن ايىپتاعان ساناۋلى حالىقارالىق اقپارات قۇرالدارىنىڭ ءبىرى. يزرايل ءال-جازيرانى حاماس-پەن ىنتىماقتاسادى دەپ ايىپتادى.

اۆتور
ەركەجان سماعۇلوۆا