يزرايل ب ۇ ۇ- عا باپور- مەن قارىم-قاتىناسىن ۇزەتىنىن رەسمي تۇردە حابارلادى
استانا. KAZINFORM - يزرايل بىرىككەن ۇلتتار ۇيىمىنا 1967 -جىلدان بەرى قىزمەت ەتىپ كەلە جاتقان ب ۇ ۇ- نىڭ پالەستينالىق بوسقىندارعا كومەك كورسەتەتىن نەگىزگى ۇيىمىمەن (باپور) قارىم-قاتىناسىن رەتتەيتىن كەلىسىمدى توقتاتاتىنىن رەسمي تۇردە حابارلادى.
بۇل تۋرالى دۇيسەنبى كۇنى يزرايل سىرتقى ىستەر مينيسترلىگى مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
سىرتقى ىستەر مينيسترلىگىنىڭ باس ديرەكتورى ياكوب بليتشتەين دۇيسەنبىدە ب ۇ ۇ باس اسسامبلەياسىنىڭ ءتوراعاسى فيلەمون يانگقا ءتيىستى حات جولدادى.
«يزرايل حالىقارالىق سەرىكتەستەرمەن، سونىڭ ىشىندە ب ۇ ۇ- نىڭ باسقا اگەنتتىكتەرىمەن گازا سەكتورىنداعى بەيبىت تۇرعىندارعا گۋمانيتارلىق كومەكتىڭ يزرايلدىڭ قاۋىپسىزدىگىنە نۇقسان كەلتىرمەيتىندەي كورسەتىلۋىن قامتاماسىز ەتۋ ءۇشىن جۇمىسىن جالعاستىرادى»، - دەلىنگەن حاتتا.
وتكەن اپتادا يزرايل پارلامەنتى ب ۇ ۇ تاياۋ شىعىستاعى پالەستينالىق بوسقىندارعا كومەك جانە جۇمىس جونىندەگى اگەنتتىگىنىڭ (باپور، UNRWA) يزرايلدە جۇمىس ىستەۋىنە تىيىم سالاتىن زاڭ قابىلدادى. زاڭ يزرايل بيلىگىنىڭ باسىپ الىنعان باتىس جاعالاۋ مەن گازا سەكتورىنداعى ميلليونداعان پالەستينالىققا كومەك جانە ءبىلىم بەرۋ قىزمەتتەرىن ۇسىناتىن ۇيىممەن ىنتىماقتاسۋىنا جول بەرمەيدى. ول سونداي-اق باپور- دىڭ يزرايل اۋماعىندا جۇمىس ىستەۋىنە تىيىم سالادى. زاڭ ءۇش ايدان كەيىن كۇشىنە ەنەدى.
ب ۇ ۇ مەن حالىقارالىق قاۋىمداستىق زاڭ جوباسى يزرايل ءبىر جىلدان بەرى حاماس سودىرلارىمەن سوعىسىپ جاتقان گازا سەكتورىنداعى ونسىز دا اۋىر گۋمانيتارلىق جاعدايدى ودان ءارى ۋشىقتىراتىنىنا الاڭداپ وتىر. تىيىم پالەستينا اۋماقتارىندا نەمەسە باسقا جەردەگى وپەراتسيالارعا سالىنعان جوق.
اۆتور
زارينا تۋعانبايەۆا
