يزرايل گازانىڭ سولتۇستىگىنە جاڭا شابۋىل جاساۋعا دايىندالىپ جاتىر

استانا. KAZINFORM - جەكسەنبى كۇنى ا ق ش پرەزيدەنتى يزرايل مەن حاماس- تى گازا سەكتورىندا اتىستى توقتاتۋ تۋرالى كەلىسىمگە كەلۋگە شاقىردى، دەپ حابارلايدى Euronews.

ا ق ش پرەزيدەنتى دونالد ترامپ گازاداعى قاقتىعىستى تەز ارادا شەشۋگە شاقىرىپ، انكلاۆتاعى 20 ايدان بەرى جالعاسىپ كەلە جاتقان قاقتىعىستاردى توقتاتۋ تۋرالى كەلىسىمگە كەلۋدى تالاپ ەتتى. 12 كۇنگە سوزىلعان يران-يزرايل سوعىسى بىتىممەن اياقتالعاننان كەيىن يزرايلدىڭ حاماس-پەن كەلىسسوزدەرى بەلسەندى كەزەڭگە وتكەنى بەلگىلى.

AP يزرايل شەنەۋنىگىنە سىلتەمە جاساپ، يزرايل پرەمەر- ءمينيسترى بينيامين نەتانياحۋ الداعى اپتالاردا ۆاشينگتونعا باراتىنىن جازدى. ال جاقىن كۇندەرى ستراتەگيالىق جوسپارلاۋ جونىندەگى حاتشى رون دەرمەر اتىستى توقتاتۋدى تالقىلاۋ ءۇشىن ول جاققا كەلۋدى جوسپارلاپ وتىر.

ا ق ش پرەزيدەنتى گازا سەكتورىندا بىتىمگە كەلۋگە شاقىرۋدان بىرنەشە ساعات بۇرىن يزرايل وعان سوققى بەرىپ، كەم دەگەندە 60 ادامنىڭ ءومىرىن قيدى، دەپ حابارلادى پالەستينانىڭ مەديتسينالىق مەكەمەلەرى.

اتىس جۇما كۇنى كەشكە باستالىپ، سەنبى كۇنى تاڭەرتەڭگە دەيىن جالعاستى. مايىتتەر جەتكىزىلگەن ءال- شيفا اۋرۋحاناسى قىزمەتكەرلەرىنىڭ ايتۋىنشا، 12 ادام قونىس اۋدارعاندار ورنالاسقان گازا قالاسىنداعى پالەستينا ستاديونىنىڭ جانىندا، ال سەگىز ادام پاتەرلەردە قازا تاپقان.

مەديتسينا قىزمەتكەرلەرىنىڭ ايتۋىنشا، 20 دان استام ءمايىت ناسەر اۋرۋحاناسىنا جەتكىزىلدى.

سەنبى كۇنى ءتۇس اۋا گازا قالاسىنىڭ شىعىسىنداعى كوشەدە بولعان شابۋىلدا 11 ادام قازا تاۋىپ، ولاردىڭ مايىتتەرى ءال- احلي اۋرۋحاناسىنا جەتكىزىلدى.

- گازادا مامىلە جاساڭدار. كەپىلدەگىلەردى قايتارىڭدار، - دەپ جازدى ترامپ جەكسەنبى كۇنى تاڭەرتەڭ الەۋمەتتىك جەلىدە.

ەكى كۇن بۇرىن ول اتىستى توقتاتۋعا كەلەسى اپتادا قول جەتكىزۋگە بولاتىنىن ايتتى. جۋرناليستەردىڭ بۇل تۋرالى سۇراعانىنا ول: «ءبىز گازا ماسەلەسىمەن اينالىسىپ جاتىرمىز جانە ونى شەشۋگە تىرىسامىز»، - دەدى.

ترامپ يزرايل مەن حاماس كەلەسى اپتادا بىتىمگە كەلەتىنىنە ۋادە ەتتى.