يزرايل گازاعا اۋقىمدى شابۋىلدى باستادى
استانا. KAZINFORM - يزرايل اسكەرلەرى حاماس- تى تالقانداپ، گازادا كەپىلدە قالعان ادامداردى بوساتۋ ءۇشىن اۋقىمدى شابۋىلدى باستاعانان مالىمدەدى، دەپ جازادى BBC.
كەشە يزرايل قورعانىس ارمياسىنىڭ حابارلاۋىنشا، «گيدەون ارباسى» اتتى وپەراتسيا بارىسىندا اسكەرگە سەكتورداعى بارلىق ستراتەگيالىق اۋداندارعا ورنىعۋ تۋرالى بۇيرىق بەرىلدى.
حاماس- تىڭ باقىلاۋىنداعى دەنساۋلىق ساقتاۋ، ازاماتتىق قورعانىس ۆەدومستۆولارىنىڭ شەنەۋنىكتەرى بەيسەنبىدەن باستاپ، يزرايلدىكتەردىڭ گازاعا جاساعان شابۋىلدارىنان 25 كە جۋىق ادام ولگەنىن حابارلاعان.
يزرايل ەكى ايلىق تاتۋلاسۋ كەلىسىمى بۇزىلعان سوڭ ناۋرىز ايىندا گازانى قورشاۋعا الدى. ا ق ش پرەزيدەنتى دونالد ترامپ جۇما كۇنى گازا سەكتورىندا كوپتەگەن ادامنىڭ اشىعىپ جاتقانىن حابارلادى.
اسكەريلەر حاماس- تان كەلەتىن قاۋىپ جويىلىپ، كەپىلدىكتەگى ادامداردىڭ ءبارى بوساتىلمايىنشا، وپەراتسيانى توقتاتپايتىنىن مالىمدەپ وتىر. ولار كەيىنگى 24 ساعاتتا گازا سەكتورى بويىنشا تەرروريستىك نىساندارعا 150-دەن استام سوققى بەرگەندەرىن ايتتى.
يزرايل كەلىسسوزدەردى جانداندىرىپ، اتىستى توقتاتىپ، بلوكادانى الىپ تاستاۋ تۋرالى حالىقارالىق دەڭگەيدە قىسىم كورسەتىلىپ جاتقانىنا قاراماستان بومبالاۋدى جانە شەكارا ماڭىندا بروندى تەحنيكا سانىن ارتتىرعان.
وپەراتسيانىڭ باستالۋى بەيبىت رەتتەۋدىڭ ەشقانداي ناتيجە بەرمەگەنىن كورسەتسە كەرەك.
Times of Israel باسىلىمىنىڭ حابارلاۋىنشا، «گەدەون ارباسى» وپەراتسياسى يزرايل قورعانىس ارمياسىنا گازا اۋماعىنا ورنىعىپ، بەيبىت تۇرعىنداردى ەلدىڭ وڭتۇستىگىنە قونىستاندىرىپ، حاماس- قا شابۋىلداپ، گۋمانيتارلىق كومەكتىڭ جەتكىزىلۋىن باقىلاۋعا الۋعا مۇمكىندىك بەرەدى.
يزرايل پرەمەر-ءمينيسترى بەنيامين نەتانياحۋ مامىر ايىنىڭ باسىندا يزرايلدىڭ گازاعا باسىپ كىرىپ، ايماقتى باسىپ الىپ، ۇستاپ تۇرۋ ءۇشىن كولەمدى شابۋىل دايىنداپ جاتقانىن ايتقان بولاتىن.
يزرايل ۇكىمەتى ترامپتىڭ تاياۋ شىعىستاعى ساپارى اياقتالمايىنشا، وپەراتسيانى باستاماۋعا ۋادە بەرگەن ەدى. پرەزيدەنت وڭىردەن جۇما كۇنى كەتتى.
ب ۇ ۇ ادام قۇقىقتارى جونىندەگى جوعارعى كوميسسارى فولكەر تيۋرك يزرايلدىڭ جاقىنداعى جاعدايدى ۋشىقتىرۋ ارەكەتى حالىقارالىق قۇقىقتى بۇزۋ بولىپ ەسەپتەلۋى مۇمكىن ەكەنىن ەسكەرتتى.
وسىعان دەيىن يزرايل اسكەرى الداعى بىرنەشە كۇندە گازاعا «تولىق كۇشپەن» كىرەتىنى تۋرالى حابارلاعانىن جازدىق.
