يزرايل گازا سەكتورىنان اسكەرىنىڭ ءبىر بولىگىن شىعاردى

گازا سەكتورىندا حاماس-قا قارسى اسكەري وپەراتسياعا قاتىسقان بىرنەشە مىڭ يزرايلدىك اسكەر ءوز اۋماعىنا ورالادى. Kazinform بۇل تۋرالى Euronews-كە سىلتەمە جاساپ حابارلايدى.

س ا ح ا ل وكىلدەرىنىڭ ايتۋىنشا، جاقىن ارادا انكلاۆتان بەس جاۋىنگەرلىك بريگادا شىعادى. بىرنەشە مىڭ اسكەري قىزمەتكەر دەمالۋ جانە وقۋ-جاتتىعۋ ءۇشىن ءوز بازالارىنا ورالادى.

اسكەري ساراپشىلاردىڭ پىكىرىنشە، بۇل سەكتوردىڭ كەيبىر اۋداندارىندا، اسىرەسە سولتۇستىكتە، يزرايل تولىعىمەن دەرلىك باقىلاۋ ورناتقان سوعىس قيمىلدارىنىڭ توقتاتىلعانىن كورسەتەدى.

سونىمەن قاتار ەۆرەي مەملەكەتىنىڭ بيلىگى ا ق ش تاراپىنان قىسىمعا ۇشىراپ جاتىر. ولار پالەستينا حالقىنا كەلتىرىلگەن شىعىندى ازايتۋ ءۇشىن يزرايلدەن اسكەري وپەراتسيانى باسەڭدەتۋىن تالاپ ەتەدى.

يزرايل ارمياسى جاڭا جىلدى گازا ايماقتارىنا سوققى بەرۋمەن باستادى. شابۋىلداردىڭ بىرىندە يزرايلگە 7-قازاندا جاسالعان شابۋىلدى جوسپارلاۋعا قاتىسقان حاماس ەليتالىق بولىمشەسىنىڭ كومانديرى قازا تاپتى، دەپ حابارلادى يزرايل اسكەريلەرى. ول كەزدە لاڭكەستەردىڭ قولىنان 1200 گە جۋىق ادام قازا تاپتى، ولاردىڭ كوپشىلىگى بەيبىت تۇرعىندار. 240 قا جۋىق يزرايلدىك پەن شەتەلدىك كەپىلگە الىندى. ولاردىڭ كوپشىلىگى ءالى دە تۇتقىندا.

سودىرلاردىڭ باقىلاۋىنداعى گازا دەنساۋلىق ساقتاۋ مينيسترلىگىنىڭ مالىمەتى بويىنشا، سوعىس كەزىندە قازا تاپقان پالەستينالىقتاردىڭ سانى 22 مىڭعا جاقىندادى. ونداعى گۋمانيتارلىق داعدارىس بۇرىن-سوڭدى بولماعان اۋقىمعا جەتتى. ب ۇ ۇ مالىمەتى بويىنشا، انكلاۆتاعى 2,3 ميلليون حالىقتىڭ 85 پايىزى ەل ىشىندە قونىس اۋدارعاندار.

«ادامدار جاڭا جىلدى قۋانىشپەن قارسى الادى، ال ءبىز ۇيدەن كەتۋگە ءماجبۇرمىز. ءبىز كوشەدە تۇرامىز جانە باسىمىزدا باسپانا جوق»، - دەپ شاعىمدانادى پالەستينالىق.