يزرايل اۋە كۇشتەرى زىمىراندىق شابۋىلعا جاۋاپ رەتىندە يەمەنگە سوققى جاسادى
استانا. KAZINFORM - حودەيدا پورتى مەن بەتون زاۋىتىنا 50 وق-ءدارى تاستالدى، بۇل حۋسيتتەر ەكونوميكاسى مەن ارمياسىنا «سوققى» بولدى، دەپ حابارلايدى Kazinform ءتىلشىسى.
دۇيسەنبى كۇنى كەشكە يزرايل اسكەري-اۋە كۇشتەرى يەمەندەگى حۋسيتتەر باقىلاۋىنا العان قىزىل تەڭىز جاعالاۋىنداعى حودەيدا پورتتىق قالاسى جانە بادجيل قالاسىنا جاقىن ماڭداعى سەمەنت زاۋىتىنا اۋەدەن سوققى جاسادى. بۇل تۋرالى يزرايل قورعانىس ارمياسىنىڭ مالىمدەمەسىندە حابارلاندى.
وپەراتسياعا 50 وق-ءدارى تاستاعان يزرايل ا ا ك 20 شاقتى جاۋىنگەرى قاتىستى. بۇل سوققىلار حۋسيتتەر توبىنىڭ ءبىر كۇن بۇرىن تەل-اۆيۆتەگى بەن-گۋريون اۋەجايىنا زىمىراندىق شابۋىلىنا جاۋاپ بولدى.
سوققىلار ا ق ش- پەن كەلىسىلدى، ءبىراق امەريكالىق كۇشتەر وپەراتسياعا تىكەلەي قاتىسقان جوق.
يزرايل اسكەريلەرى ۇشاقتاردىڭ ۇشۋعا دايىندالىپ جاتقانى تۇسىرىلگەن سۋرەتتەردى جاريالادى. سونداي-اق وپەراتسياعا يزرايل ا ا ك جانارماي قۇيۋ جانە بارلاۋ ۇشاقتارى قاتىستى.
يزرايل قورعانىس ارمياسى حۋسيتتەر حودەيدا پورتىن «يران قارۋ-جاراعىن، اسكەري تەحنيكاسىن جانە باسقا دا لاڭكەستىك ماقساتتاردى تاسىمالداۋ ءۇشىن» پايدالانعانىن مالىمدەدى.
تساحال بادجيلداعى بەتون زاۋىتى «حۋسيتتەردىڭ لاڭكەستىك رەجيمى ءۇشىن ماڭىزدى ەكونوميكالىق رەسۋرس قىزمەتىن اتقاراتىنىن جانە تۋننەلدەر مەن اسكەري ينفراقۇرىلىمداردى سالۋ ءۇشىن پايدالانىلاتىنىن» مالىمدەدى. بۇعان قوسا سوققىلار «رەجيمنىڭ ەكونوميكاسى مەن اسكەري مۇمكىندىكتەرىنە سوققى جاساعانىن» قوسىپ ءوتتى.
- ەرەۋىل حۋسيتتەردىڭ لاڭكەستىك رەجيمىنىڭ يزرايل مەملەكەتىنە بىرنەشە رەت شابۋىل جاساۋىنا جاۋاپ بولدى، ونىڭ بارىسىندا يزرايل اۋماعى مەن ونىڭ بەيبىت تۇرعىندارىنا «جەر- جەر» كلاسىنداعى زىمىراندار مەن ۇشقىشسىز باسقارىلاتىن ۇشاقتار جىبەرىلدى، - دەلىنگەن اسكەريلەر مالىمدەمەسىندە.
الەۋمەتتىك جەلىدەگى كادرلاردان بەتون زاۋىتىنداعى ءورتتى كورۋگە بولادى. يەمەننىڭ حۋسيتتەر باقىلايتىن دەنساۋلىق ساقتاۋ مينيسترلىگى مالىمدەگەندەي، ءورت سالدارىنان كەم دەگەندە 21 ادام زارداپ شەكتى.
سوققىلار جەكسەنبى كۇنى يەمەننەن اتىلعان زىمىران تەل- اۆيۆ ماڭىنداعى بەن-گۋريون اۋەجايىنىڭ پەريمەترىنە تۇسكەننەن كەيىن جاسالدى. بۇل حۋسيتتەر زىمىرانى وعان توسقاۋىل جاساۋ ارەكەتىنە قاراماستان اۋەجايعا كەلىپ جەتكەن العاشقى جاعداي.
زىمىران اۋەجايداعى كولىك تۇراعىنا جاقىن جەردە ۇلكەن شۇڭقىر قالدىرىپ، سالدارىنان التى ادام جاراقات الدى، ال كوپتەگەن حالىقارالىق اۋە كومپانياسى رەيستەرىن توقتاتۋعا ءماجبۇر بولدى.
يزرايل پرەمەر-ءمينيسترى بينيامين نەتانياحۋ حۋسيتتەر مەن ولاردىڭ يراندىق قولداۋشىلارىنا جاۋاپ قايتارۋعا ۋادە بەردى. حۋسيتتەر وزدەرىنىڭ ارەكەتتەرىن پالەستينالىقتارمەن ىنتىماقتاسۋ ارەكەتى دەپ اتاپ، شابۋىلداردى يزرايل گازاداعى اسكەري وپەراتسيالارىن توقتاتپاعانشا جالعاستىراتىنىن مالىمدەدى.
بۇعان دەيىن حۋسيتتەر تەل- اۆيۆتەگى بەن-گۋريون اۋەجايىنا شابۋىل جاساعانىن جازعان بولاتىنبىز.
سونداي-اق يەمەندىك حۋسيتتەر ا ق ش- تىڭ سانا مەن ونىڭ ماڭىنداعى اۋداندارعا 10 سوققى جاساعانىن حابارلادى.
