يزرايل 60 كۇندىك بىتىمگە كەلۋدىڭ شارتتارىمەن كەلىستى - ترامپ
استانا. KAZINFORM - ا ق ش پرەزيدەنتى دونالد ترامپ ۆاشينگتون وكىلدەرىمەن كەزدەسۋىندە يزرايل گازا سەكتورىندا ەكى ايلىق اتىستى توقتاتۋعا قاجەتتى شارتتارمەن كەلىسكەنىن ايتتى، دەپ حابارلايدى BBC.
- بۇگىن وكىلدەرىم يزرايلدىكتەرمەن گازا ماسەلەسى بويىنشا ۇزاق ءارى ناتيجەلى كەزدەسۋ وتكىزدى. يزرايل 60 كۇندىك بىتىمگە كەلۋدىڭ قاجەتتى شارتتارىنا كەلىستى. وسىعان وراي ءبىز بارلىق تاراپپەن سوعىستى توقتاتۋ ءۇشىن جۇمىس ىستەيتىن بولامىز، - دەپ جازدى ول Truth Social الەۋمەتتىك جەلىسىندە.
ا ق ش باسشىسى جازباسىندا ءبىراق ونىڭ ناقتى قانداي شارتتار ەكەنىن ناقتىلاعان جوق.
امەريكا كوشباسشىسىنىڭ ايتۋىنشا، «بەيبىتشىلىك ورناتۋ ءۇشىن كوپ ەڭبەك ەتكەن» قاتار مەن مىسىر وكىلدەرى كەيىنگى ۇسىنىستى حاماس سودىرلارىنا جەتكىزەدى.
- تاياۋ شىعىستىڭ يگىلىگى ءۇشىن حاماس بۇل كەلىسىمدى قابىلدايدى دەپ ۇمىتتەنەمىن، - دەپ قوستى ترامپ.
بۇعان بايلانىستى حاماس وكىلدەرى ازىرگە تۇسىنىك بەرگەن جوق.
امەريكالىق ب ا ق وسىعان دەيىن ءيزرايلدىڭ ستراتەگيالىق جوسپارلاۋ ءمينيسترى رون دەرمەردىڭ ۆاشينگتونعا كەلگەنىن، ول اق ءۇي وكىلدەرىمەن گازا سەكتورى مەن يرانداعى جاعدايدى، سونداي-اق يزرايل پرەمەر- ءمينيسترى بينيامين نەتانياحۋدىڭ ا ق ش- قا ساپارىن تالقىلاۋى ءتيىس بولعانىن حابارلاعان.
ترامپ سەيسەنبىدە نەتانياحۋ گازاداعى شايقاستاردىڭ توقتاتىلۋىن قالايتىنىن ايتتى.
ايتا كەتەيىك، ءيزرايلدىڭ گازا سەكتورىنا جاساعان سوققىسىنان بارلىعى 95 پالەستينالىق قازا تاپقانى حابارلاندى. جەكسەنبى كۇنى ا ق ش پرەزيدەنتى يزرايل مەن حاماس-تى گازا سەكتورىندا اتىستى توقتاتۋعا شاقىردى.
