ۆيزاسىز رەجيم: جەتىسۋ وبلىسىنداعى شەكارا بەكەتتەرى قىزمەت كورسەتۋگە دايىن با؟

بۇگىن، 10-قاراشادان باستاپ قازاقستان مەن قىتاي اراسىنداعى ۆيزاسىز رەجيم كۇشىنە ەنەدى. ەندى ەكى ەل ازاماتتارى تۋريستىك ماقساتتا شەكارادان ەركىن ءوتىپ، 30 كۇن بويى جۇرە الادى، دەپ حابارلايدى Kazinform.

ۆيزاسىز رەجيمنىڭ كۇشىنە ەنۋى شەكاراداعى باقىلاۋ بەكەتتەرى مەن اۋماقتاعى باسقا دا قىزمەتتەردىڭ جۇمىسىنا قوسىمشا سالماق تۇسىرگەلى تۇر. اسىرەسە، كولىك قوزعالىسى، جولاۋشىلار تاسىمالى، قوناق ءۇي مەن تاماقتانۋ ورىندارىنىڭ قىزمەتىنە قاتىستى دايىندىق جۇمىستارىن شيراتۋ كۇن تارتىبىندە. بۇل جۇمىس جەتىسۋ وبلىسىنىڭ پانفيلوۆ اۋدانىندا دا ءجۇرىپ جاتىر. اۋدان اۋماعىندا بىرنەشە شەكارالىق بەكەت بار. ونىڭ ىشىندە «نۇر جولى» وتكىزۋ بەكەتىنىڭ جۇمىسى قىزايىن دەپ تۇر. ەكى ەل ازاماتتارى نەگىزىنەن وسى بەكەت ارقىلى ءوتىپ، قاتىنايدى.

وسىعان وراي پانفيلوۆ اۋدانى اكىمدىگىنىڭ جانىنداعى كەزەكتەن تىس اۋداندىق جەدەل شتاب وتىرىسى ءوتتى. وتىرىستا قىتاي ەلىمەن ۆيزاسىز رەجيمنىڭ كۇشىنە ەنۋىنە بايلانىستى شەكارالىق اۋماقتا تۋىندايتىن ماسەلەلەر تالقىلاندى.

جيىنعا پروكۋراتۋرا، ۇلتتىق قاۋىپسىزدىك كوميتەتى، شەكارا جانە كەدەن قىزمەتى مەن قۇقىق قورعاۋ ورگاندارىنىڭ باسشىلارى، سونداي-اق وزگە دە مەكەمە باسشىلارى قاتىستى.

وتىرىستا اۋدان اكىمى مارات ساعىمبەك «نۇر جولى» وتكىزۋ بەكەتىندەگى جولاۋشىلاردى قابىلداۋ ءبولىمى ونداعى كورسەتىلەتىن قىزمەتتەر ءتۇرى مەن اۆتوبۋس تاسىمالى سىندى ماسەلەلەردى جەتكىزىپ، ءبىرقاتار مەكەمە باسشىلارىنا كەمشىلىكتەردى جويۋ تۋرالى تاپسىرما بەردى.

«ۆيزاسىز رەجيم ەلىمىزدەگى تۋريزمدى دامىتۋعا سەرپىن بەرەدى. ءبىز تۋريستىك ايماق رەتىندە ساپالى قىزمەت كورسەتۋىمىز قاجەت. بۇل ءبىزدىڭ اۋدانىمىزدىڭ ەكونوميكاسى ءۇشىن ايتارلىقتاي پايدالى. بولاشاقتا ءتۇرلى قىزمەت كورسەتۋ ورىندارىن اشىپ، تۋريستىك باعىتتا جۇمىستار جۇرگىزبەكپىز. قازىردىڭ وزىندە وعان قاتىستى جوسپارلارىمىز بار. باستىسى شەكارا ماڭىن تارتىپكە كەلتىرىپ، ءبارىن ءبىر جولعا قويىپ، زاڭدى تۇردە جۇمىس جۇرگىزۋ مىندەتى تۇر»، - دەيدى پانفيلوۆ اۋدانىنىڭ اكىمى مارات ساعىمبەك.

اۆتور

قالماحانبەت مۇقامەتقالي