يوردانيا مەن ب ا ءا گازاعا اۋەدەن گۋمانيتارلىق كومەك جىبەرە باستادى

يزرايلدىڭ بلوكاداسىنان تۋىنداعان اشتىق اياسىندا ب ا ءا مەن يوردانيا گازاعا گۋمانيتارلىق كومەكتى اۋەدەن تاستاي باستادى، دەپ حابارلايدى انادولى.

يزرايلدىڭ مەملەكەتتىك KAN تەلەارناسىنىڭ حابارلاۋىنشا، بىرىككەن اراب امىرلىكتەرى مەن يوردانيانىڭ ۇشاقتارى گازاداعى قالاعا پاراشيۋتپەن سەگىز قوراپ گۋمانيتارلىق كومەك ءتۇسىردى.

حابارلامادا اتالعانداي، بۇل قوراپتاردىڭ تورتەۋى گازانىڭ ەسكى قالا اۋدانىندا، ال قالعان تورتەۋى قالانىڭ سولتۇستىگىندەگى زەيتۋن ىقشام اۋدانىندا تاستالعان.

يزرايل ارمياسى بۇعان دەيىن جۇما كۇنىنەن باستاپ شەتەلدىك مەملەكەتتەرگە گازا سەكتورىنا اۋەدەن گۋمانيتارلىق كومەك تۇسىرۋگە رۇقسات بەرەتىنىن مالىمدەگەن بولاتىن.

بۇعان دەيىن اۋەدەن تاستالعان كومەكتىڭ سالدارىنان بەيبىت تۇرعىنداردىڭ قازا تاپقانى تۋرالى دا حابارلانعان ەدى، سەبەبى كەيبىر قوراپتار ادامداردىڭ ۇستىنە قۇلاعان.

جۇكتەردىڭ ءبىر بولىگى تەڭىزگە قۇلاپ كەتكەندىكتەن، اشتىقتان زارداپ شەككەن تۇرعىندار جاعالاۋعا اعىلۋعا ءماجبۇر بولدى. بۇل كومەك جەتكىزۋ ءتاسىلى قوعام تاراپىنان سىنعا ۇشىرادى.

يزرايلدىڭ بلوكاداسىنان تۋىنداعان گۋمانيتارلىق داعدارىس سالدارىنان گازا سەكتورىندا اشتىقتان كوز جۇمعان پالەستينالىقتار سانى 133 ادامعا جەتتى.