ۇگىتىلىپ جاتىر: اقتوبەدە ميلليارد تەڭگەنىڭ ۆەلوجولىنان شۋ شىقتى

اقتوبە. KAZINFORM - اقتوبە قالاسىنداعى ۆەلوجول قۇرىلىسىنىڭ جوباسى مەن ونىڭ ىسكە اسىرىلۋىن اۋديتورلار تەكسەرىپ، 34 ميلليون تەڭگەنىڭ بۇزۋشىلىقتارىن انىقتادى. ءىس سوتتا دا قارالدى.

اقتوبە قالاسىنىڭ تۇرعىنى يۋريي كۋليكوۆتىڭ شاعىمى نەگىزىندە اقتوبە وبلىسى بويىنشا ىشكى مەملەكەتتىك اۋديت دەپارتامەنتى قالالىق تۇكش، جولاۋشىلار كولىگى جانە اۆتوموبيل جولدارى بولىمىنە اۋديت جۇرگىزدى.

اۋديتورلار قالاداعى ۆەلوجول سال جۇمىسىنىڭ قۇجاتىنان ءبىرقاتار كەمشىلىك انىقتادى.

- اقتوبە قالالىق تۇكش، جولاۋشىلار كولىگى جانە اۆتوموبيل جولدارى ءبولىمى مەن «Global Construction Development» ج ش س اراسىندا 1327872000 تەڭگەگە كەلىسىمشارت جاسالعان. «اقتوبە قالاسىندا ۆەلوجولداردى جايلاستىرۋ» بويىنشا كونكۋرس جاريالاعانىمەن، جوبالىق-سمەتالىق قۇجات بولماعان. بۇل جەردە «ساۋلەت، قالا قۇرىلىسى جانە قۇرىلىس قىزمەتى تۋرالى» زاڭنىڭ 60-بابى 1-تارماعىنىڭ تالاپتارى بۇزىلىپ تۇر. بۇل - ءبىرىنشى بۇزۋشىلىق. ەكىنشىدەن 665761900 تەڭگەنىڭ جۇمىسى اتقارىلدى دەپ اقشا اۋداردى. اۋديت كەزىندە 34 ميلليون تەڭگەدەن استام قارجىنىڭ جۇمىسى اتقارىلماعانى بەلگىلى بولدى. وسى كەمشىلىكتەرگە قاراماستان اقتوبە قالالىق تۇكش، جولاۋشىلار كولىگى جانە اۆتوموبيل جولدارى ءبولىمى اكتىگە قول قويىپ، جۇمىستى قابىلداپ العان، - دەدى اقتوبە وبلىسى بويىنشا ىشكى مەملەكەتتىك اۋديت دەپارتامەنتىنىڭ باسشىسى ساكەن قاسىموۆ.

سونىمەن بىرگە اقتوبە وبلىسى بويىنشا ىشكى مەملەكەتتىك اۋديت دەپارتامەنتى مەملەكەتتىك ساتىپ الۋدى جۇرگىزۋ بارىسىندا جوبالىق-سمەتالىق قۇجاتتامانىڭ بولماعانى ءۇشىن قالالىق تۇكش، جولاۋشىلار كولىگى جانە اۆتوموبيل جولدارى ءبولىمى مەن «Global Construction Development» ج ش س- ءى اراسىنداعى كەلىسىمشارتتى جارامسىز دەپ تانۋ جونىندە سوتقا تالاپ ارىز بەردى.

سوت تالاپ ارىزدى قاناعاتتاندىردى. الايدا ءالى زاڭدى كۇشىنە ەنگەن جوق.

ال انىقتالعان بۇزۋشىلىقتار، ياعني، اتقارىلماعان جۇمىسقا قارجى تولەگەنى ءۇشىن اقتوبە قالالىق تۇكش، جولاۋشىلار كولىگى جانە اۆتوموبيل جولدارى بولىمىنە نۇسقاما بەرىلدى.

ياعني، بۇزۋشىلىقتار جويىلىپ، قارجى كەرى قايتارىلۋى ءتيىس.

ءوز كەزەگىندە قالالىق تۇكش، جولاۋشىلار كولىگى جانە اۆتوموبيل جولدارى ءبولىمى «Global Construction Development» ج ش س- نەن 34781900 تەڭگەنى قايتارىپ الۋ ءۇشىن سوتقا تالاپ ارىز بەردى. قازىر ءىس قارالىپ جاتىر.

اقتوبە وبلىستىق سوتى باسپا ءسوز قىزمەتىنىڭ حابارلاۋىنشا، جوبالىق-سمەتالىق قۇجاتتاماسى، ساراپتاما قورىتىندىسى بولماسا دا قۇرىلىس-مونتاجداۋ جۇمىسىن جۇرگىزگەن مەردىگەرگە قاتىستى ءىس اقتوبە وبلىستىق قىلمىستىق ىستەر جونىندەگى سوت القاسىندا قارالىپ، مەردىگەرگە اكىمشىلىك قۇقىقبۇزۋشىلىق تۋرالى كودەكستىڭ «تەحنيكالىق رەگلامەنتتەردە بەلگىلەنگەن تالاپتاردى قوسپاعاندا، ساۋلەت، قالا قۇرىلىسى جانە قۇرىلىس قىزمەتى سالاسىنداعى قازاقستان رەسپۋبليكاسىنىڭ زاڭناماسى مەن مەملەكەتتىك نورماتيۆتەردىڭ تالاپتارىن بۇزا وتىرىپ، جوبالاۋ الدىنداعى، ىزدەستىرۋ، جوبالاۋ، قۇرىلىس-مونتاجداۋ جۇمىستارىن ورىنداۋ» بابى بويىنشا 200 ا ە ك، ياعني، 690000 تەڭگە كولەمىندە ايىپپۇل سالىندى.

اپەللياتسيالىق قاۋلى زاڭدى كۇشىنە ەندى.