ۆيتسە-پرەمەر دوللار باعامى جايلى: دۇربەلەڭگە ەرۋدىڭ ءجونى جوق

استانا. KAZINFORM - ۇكىمەتتە ۆاليۋتا نارىعىن تۇراقتاندىراتىن قۇرالدار بار. بۇل تۋرالى ۇكىمەتتە ءوتىپ جاتقان بريفينگتە پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.

- مەملەكەت ازاماتتاردى الەۋمەتتىك قامتاماسىز ەتەدى. كەلەسى جىلعا ارنالعان بيۋدجەت يندەكستەلدى جانە بارلىق الەۋمەتتىك شىعىس ارتتى. ۆاليۋتانى ساتىپ الۋ، الماۋ ءار ازاماتتىڭ تاڭداۋى. ءبىراق، ءدال قازىرگى جاعدايدا دۇربەلەڭگە ەرۋدىڭ ءجونى جوق دەپ ويلايمىن. ءبىز مۇنداي جاعدايدى 2022 -جىلى باستان كەشىردىك. سول ۋاقىتتا ادامدار ءبىر دوللاردى قايتالاما نارىقتان 600 تەڭگەدەن ساتىپ الدى دا تۇپتەپ كەلگەندە تەرىس قارجىلىق بالانسقا تاپ بولدى، - دەدى نۇرلان بايبازاروۆ ب ا ق وكىلدەرىنىڭ ساۋالىنا وراي.

ۆيتسە- پرەمەردىڭ اتاپ وتۋىنشە، ۇكىمەتتە ۆاليۋتا نارىعىن تۇراقتاندىراتىن قۇرالدار بار جانە ونىڭ جالپى ەكونوميكاعا، ازاماتتاردىڭ الەۋمەتتىك قورعالۋىنا تەرىس ىقپالىن بارىنشا تومەندەتۋ ءۇشىن قاجەتتى شارانىڭ ءبارى قولدانىلادى. سونىمەن قاتار ول رەسپۋبليكالىق بيۋدجەتتە 1 دوللاردىڭ ورتاشا باعامى 470 تەڭگە دەپ بەلگىلەنگەنىن ەسكە سالدى.

- ازىرشە، اتالعان باعامدى قايتا قاراستىرايىق دەپ وتىرعانىمىز جوق. ۆاليۋتا باعامىنىڭ ديناميكاسىن قارايمىز. مەنىڭشە، ءبىرىنشى توقساندا قاي باعىتتا ءجۇرۋمىز قاجەتتىگى ايقىندالىپ قالار، - دەدى ول.

اۆتور

مارلان جيەمباي