ۆيتسە-پرەمەر الاكول جاعالاۋىنىڭ جەردى پايدالانۋ كارتاسىمەن تانىستى
استانا. KAZINFORM - مەملەكەت باسشىسىنىڭ ىشكى تۋريزمنىڭ ساپاسى مەن قاۋىپسىزدىگىن ارتتىرۋ جونىندەگى تاپسىرمالارىن جۇزەگە اسىرۋ اياسىندا ق ر پرەمەر-ءمينيسترىنىڭ ورىنباسارى ەرمەك كوشەربايەۆ ەلدىڭ نەگىزگى تۋريستىك باعىتتارىن قامتيتىن وڭىرلەردە جۇمىس ساپارىن جالعاستىرىپ جاتىر.
اباي وبلىسىنا جاساعان جۇمىس ساپارى بارىسىندا ەرمەك كوشەربايەۆ الاكول كولىنىڭ جاعالاۋىنداعى تۋريستىك ينفراقۇرىلىمنىڭ جاي-كۇيىمەن تانىستى. ايتا كەتۋ كەرەك، كول جاعالاۋى بىرنەشە تۋريستىك ايماقتان تۇرادى: اباي جانە جەتىسۋ وبلىستارىنداعى جاعاجايلار - ءارقايسىسى ءوز ەرەكشەلىگى، ينفراقۇرىلىمدىق جۇكتەمەسى جانە دامۋ باعىتى بار جەكە لوكاتسيالار.
اباي وبلىسىنداعى كول جاعالاۋىندا پرەمەر- ءمينيستردىڭ ورىنباسارى دەمالۋشىلارمەن، كاسىپكەرلەرمەن جانە مەديتسينا قىزمەتكەرلەرىمەن كەزدەسىپ، اباتتاندىرۋ نىساندارى مەن مەديتسينالىق پۋنكتتى قاراپ شىقتى. سانيتارلىق جاعداي، رۇقساتسىز ساۋدا، اباتتاندىرۋ مەن قاۋىپسىزدىك ماسەلەلەرىنە ەرەكشە نازار اۋدارىلدى. ازاماتتار مەن تۋريستەردىڭ وتىنىشتەرى بويىنشا ءبىرقاتار تاپسىرما بەرىلدى:
• تاماق ونىمدەرىنىڭ رۇقساتسىز ساۋداسىنا قاتىستى سانيتارلىق-ەپيدەميولوگيالىق قىزمەتتىڭ تەكسەرىسىن ۇيىمداستىرۋ؛
• جاعالاۋدىڭ تازالىعىنا باقىلاۋدى كۇشەيتۋ جانە قوقىستى جۇيەلى تۇردە شىعارۋ؛
• دەمالۋشىلار كوپ جينالاتىن جەرلەرگە قوسىمشا قوقىس جاشىكتەرى مەن كونتەينەرلەر ورناتۋ؛
• تۋريستىك ايماقتى تۇراقتى بايلانىسپەن قامتاماسىز ەتۋ ماسەلەسىن قاراستىرۋ.
سونىمەن قاتار پرەمەر-ءمينيستردىڭ ورىنباسارى جاعالاۋ بويىنداعى جەر پايدالانۋ كارتاسىمەن تانىسىپ، قولدانىستاعى باس جوسپارعا تالداۋ جۇرگىزۋدى تاپسىردى. كاسىپكەرلەردىڭ سۋ ايدىنىنا كىرۋگە شەكتەۋ قويىلۋى جەكە ماسەلە رەتىندە قارالدى. جەرگىلىكتى اتقارۋشى ورگاندارعا بۇزۋشىلىقتاردى تەز ارادا انىقتاپ، ازاماتتاردىڭ سۋعا ەركىن ءوتۋىن قامتاماسىز ەتۋ تاپسىرىلدى.
اباتتاندىرۋ جانە ينفراقۇرىلىمدى جاڭعىرتۋ
بيىل الاكول كولىنىڭ جاعالاۋىندا اۋقىمدى رەكونسترۋكتسيالاۋ جانە اباتتاندىرۋ جۇمىستارى باستالدى. وبلىستىق بيۋدجەتتەن 658 ميلليون تەڭگە ءبولىندى، ونىڭ ىشىندە:
108,9 ميلليون تەڭگە - اربات الاڭىن جوندەۋگە،
171,6 ميلليون تەڭگە جاڭا قوعامدىق كەڭىستىك قۇرۋعا
107,5 ميلليون تەڭگە جاعالاۋدى اباتتاندىرۋعا.
جاعاجايدا 25 كيىم اۋىستىرۋ كابيناسى، 50 قوقىس كونتەينەرى، 2 بيودارەتحانا، 10 سانيتارلىق توراپ (ماۋسىم سوڭىنا دەيىن 18 گە دەيىن جەتكىزىلەدى) ورناتىلدى. 7 پيرستىڭ 3 ەۋى سالىندى، جارىقتاندىرۋ جۇرگىزىلىپ، قۇتقارۋ مۇنارالارى ورنالاستىرىلدى. قوسىمشا 300 ميلليون تەڭگە ءبولىندى:
• 141,6 ميلليون تەڭگە - كابانباي اۋىلىندا ءورت ءسوندىرۋ دەپوسىنىڭ قۇرىلىسىنا؛
• 57,7 ميلليون تەڭگە - كول جاعالاۋىندا قۇتقارۋ ستانتسياسى قۇرىلىسىنا؛
• 100 ميلليون تەڭگە - تۋريستىك اۋماقتى دامىتۋدىڭ باس جوسپارىن ازىرلەۋگە.
ەل بويىنشا جۇيەلى ءتاسىل
ەرمەك كوشەربايەۆ تۋريستىك ايماقتاردى جاقسارتۋ جۇمىسى ەلدىڭ بارلىق وڭىرلەرىن قامتيتىن مەملەكەتتىك ستراتەگيا اياسىندا جۇزەگە اسىرىلۋى قاجەتتىگىن اتاپ ءوتتى:
- باستى مىندەت - ۋاقىتشا شەشىمدەر قابىلداماي، تازا جاعاجايلار، قاۋىپسىز دەمالىس، تۇراقتى بايلانىس جانە ويلاستىرىلعان ينفراقۇرىلىمدى قامتيتىن ورنىقتى جۇيە قالىپتاستىرۋ. تۋريزم - ازاماتتار ءۇشىن جايلى، ال وڭىرلەر ءۇشىن وركەنيەتتى ەكونوميكالىق اسەر اكەلۋى ءتيىس، - دەدى ول.
بارلىق وڭىردە انىقتالعان ماسەلە ورتاق: قوقىس جاشىكتەرىنىڭ جەتىسپەۋى، بەيبەرەكەت ساۋدا، بايلانىستىڭ ناشارلىعى، زاڭسىز قۇرىلىستار. وسىعان بايلانىستى وڭىرلەرگە جاساعان ساپار قورىتىندىسى بويىنشا تۋريستىك ايماقتاردى جوسپارلاۋدىڭ ستاندارتتارىن وزگەرتۋ جانە اكىمدىكتەر مەن قاداعالاۋ ورگاندارىمەن ءوزارا ءىس-قيمىلدى كۇشەيتۋ سىندى جۇيەلى شارالار قابىلدانادى. باقىلاۋ ۇكىمەت دەڭگەيىندە جۇزەگە اسىرىلادى.
