يتالياداعى اۆتوجۇمىسشىلار 20 جىل ىشىندە العاش رەت ەرەۋىلگە شىقتى
استانا. قازاقپارات - 20 جىل ىشىندە يتاليانىڭ العاشقى جالپىۇلتتىق ەرەۋىلىنە قاتىسۋ ءۇشىن جۇما كۇنى ريم كوشەلەرىنە ونداعان مىڭ اۆتوجۇمىسشى شىقتى. بۇل تۋرالى Euronews جازدى.
نەگىزگى ءۇش وداق ۇكىمەتتەن سەكتورداعى جۇمىسپەن قامتۋدى قورعاۋدى جانە جاھاندىق اۆتووندىرۋشى Stellantis-تەن باستاپ يتالياداعى اۆتوونەركاسىپتىڭ بولاشاعىن جانداندىرۋدى تالاپ ەتىپ وتىر.
- ءبىز سىني نۇكتەگە جاقىنداپ كەلەمىز: ءوندىرىس كولەمى تومەندەپ بارادى. ءتىپتى ەلىمىزدە 500 مىڭ اۆتوكولىك وندىرىلمەيدى. بۇل - 1956-جىلدان بەرى بولماعان جاعداي. سوڭعى ءۇش جىلدا ءبىز 12 مىڭنان استام قىزمەتكەردەن ايىرىلدىق. جۇمىستان بوساتۋ نورماعا اينالدى. پرەمەر- مينيستر باس ديرەكتورمەن جانە اتالعان وداق باسشىلارىمەن كەزدەسۋى ءتيىس. ءبىز ءۇشىن ەكونوميكانىڭ ەڭ قۇندى سالالارىنىڭ ءبىرىن جانداندىرۋ ءۇشىن كوبىرەك ينۆەستيتسيا تارتۋ وتە ماڭىزدى»، - دەپ اتاپ ءوتتى Fim Cisl وكىلى فەرديناندو ۋليانو.
الەمدەگى ءتورتىنشى ءاۆتووندىرۋشى Stellantis ءوزىنىڭ وندىرىستىك جوسپارلارىن ناقتىلاۋعا ءماجبۇر، سەبەبى ول باسەكەلەستىك پەن قارجىلىق قيىندىقتاردىڭ كۇشەيۋىنە تاپ بولادى.
يتاليانىڭ وڭشىل ۇكىمەتى كومپانيانى قۇراستىرۋ زاۋىتتارىن ارزان ەلدەرگە كوشىردى دەپ ايىپتايدى.
- «Stellantis-تە بولعان جاعداي وتە ماڭىزدى. ءبىز شەتەلدەن كەلگەن بارلىق ساۋالدى قاراستىرىپ جاتىرمىز جانە قازىرگى ۋاقىتتا شىعارىلىپ جاتقان اۆتوكولىكتەر يسپانيادان، ماروككودان، پولشادان جەتكىزىلەتىنىن كورىپ وتىرمىز. بۇل ءبىزدى قاتتى مازالايدى، - دەدى Stellantis قىزمەتكەرى دجۋزەپپە د'التەريو.
ءوز كەزەگىندە Euronews ءتىلشىسى دە اتالعان جاعدايعا قاتىستى پىكىر ءبىلدىردى.
- داعدارىستى ەڭسەرۋگە ۇندەۋ جاھاندىق سيپاتقا يە، ول بۇكىل ەۋروپالىق اۆتوموبيل ونەركاسىبىنە قاتىستى. باسەكەلەستىك پەن «جاسىل ەكونوميكاعا» كوشۋ سەكتورعا كەرى اسەرىن تيگىزدى. سوندىقتان ەو- نىڭ بىرنەشە ەلىنەن كاسىپوداق وكىلدەرى جينالىپ، قارسىلىققا قوسىلدى، - دەيدى Euronews ءتىلشىسى دجوردجيا ورلاندي ريمنەن.
2021-جىلى Fiat-Chrysler جانە PSA Peugeot كومپانيالارىنىڭ بىرىگۋى ناتيجەسىندە قۇرىلعان كوپۇلتتى توپ 2024-جىلدىڭ ءبىرىنشى جارتىجىلدىعىندا ءوزىنىڭ يتاليالىق زاۋىتتارىنىڭ كوپشىلىگىندە ءوندىرىستىڭ كۇرت قۇلدىراۋىن تىركەدى. سوڭعى 17 جىلدا اۆتووندىرۋشى يتاليالىق ءوندىرىستى شامامەن %70 عا قىسقارتتى.
