يتاليادا تۋريستىك اۆتوبۋس وزەنگە قۇلاپ كەتتى
استانا. KAZINFORM - تۋريندەگى (يتاليا) پياتستسا ۆيتتوريو ۆەنەتو ماڭىندا تۋريستىك اۆتوبۋس پو وزەنىنە قۇلادى. كولىك قورشاۋدى بۇزىپ، وزەنگە قۇلاپ، جارتىلاي سۋعا باتقان. اۆتوبۋس جۇرگۋزىشىسى مەرت بولدى، دەپ جازادى La Republica باسىلىمى.
اۆتوبۋستا تەك جۇرگىزۋشى عانا بولعان، ونى ەس-ءتۇسسىز كۇيدە قۇتقارىپ العان. دارىگەرلەردىڭ كومەگىنە قاراماستان ول قايتىس بولعان. وقيعا ورنىنا قۇتقارۋشىلار تىكۇشاق ەكيپاجىمەن كەلگەن. جول اپاتى كەزىندە باسقا جولاۋشىلار نەمەسە جاياۋ جۇرگىنشىلەر زارداپ شەككەن بولۋى مۇمكىن دەگەن بولجام بويىنشا ىزدەۋ جۇرگىزىلدى، ءبىراق ەشكىم تابىلمادى.
وقىس وقيعا قالانىڭ تاريحي ورتالىعىنا جاقىن ورنالاسقان مۋراتستسي اۋدانىندا بولعان. كامپوباسسوداعى Di Carlo Tour جەكە كومپانياسىنا تيەسىلى اۆتوبۋس كەرى باعىتتا كەلە جاتىپ اپاتقا ۇشىراعان.
جۇرگىزۋشى 63 جاستاعى نيكولا دي كارلو باسقا باعىتپەن ءجۇرىپ كەتكەن نەمەسە ءوزىن ناشار سەزىنگەندىكتەن ارتقا قاراي ارەكەت ەتكەن دەگەن بولجام بار. قوزعالىس كەزىندە اۆتوبۋس ءۇش ايەلدى قاعىپ كەتكەن، ءبىراق ولار اۋىر جاراقات الماعان، جابىرلەنگەندەر جاعدايىن باقىلاۋ ءۇشىن اۋرۋحاناعا جەتكىزىلگەن.
- قىزمەتتىك تەرگەۋ باستالدى. قازىر بۇل ىسپەن تۋرين قالالىق پوليتسياسى اينالىسىپ جاتىر. ءورت سوندىرۋشىلەر اۆتوبۋستى سۋدان شىعارا سالىسىمەن ول تاركىلەنىپ، تەحنيكالىق ساراپتاما باستالادى. ەڭ الدىمەن تەجەۋ جۇيەسى تەكسەرىلەدى. ودان ءارى جۇرگىزۋشىنىڭ ءولىم سەبەبى انىقتالادى، - دەلىنگەن حاباردا.
ايتا كەتەيىك، بۇعان دەيىن اقمولا وبلىسىندا اۆتوبۋس پەن جەڭىل كولىك سوقتىعىسقانىن جازعان ەدىك.
