يتاليادا «دەموگرافيالىق» توتەنشە جاعداي جاريالاندى

Демография
فوتو: Euronews.com

استانا. KAZINFORM - يتالياندىق الەۋمەتتانۋشىلار مەن دەموگرافتاردى ەلدەگى حالىقتىڭ قارتايۋى جانە تۋۋ كورسەتكىشىنىڭ تومەندەۋى قاتتى الاڭداتادى. كوپشىلىك دجوردجي مەلوني ۇكىمەتىنىڭ قولدانىپ جاتقان شارالارى جەتكىلىكسىز ءارى ەل جاقىن ارادا دەموگرافيالىق قۇلدىراۋعا تاپ بولۋى مۇمكىن دەپ سانايدى، دەپ حابارلايدى Euronews.

سوڭعى جىلدارى بۇكىل ەۋروپادا تۋۋ كورسەتكىشىنىڭ تومەندەۋى بايقالدى. بۇل ماسەلە اسىرەسە يتاليادا وتكىر بولىپ وتىر.

ەلدە تۋۋ كورسەتكىشى ەۋروپالىق وداقتاعى ەڭ تومەن كورسەتكىشكە يە. بۇعان قوسا جەرگىلىكتى تۇرعىندار قاۋىمداستىقتىڭ باسقا ەلدەرىنە قاراعاندا الدەقايدا جىلدام قارتايىپ جاتىر.

«دەموگرافيالىق شۇڭقىرعا» سىرعىپ كەتۋدىڭ الدىن الۋ - يتاليا ۇكىمەتى مەن «يتاليا اعايىندىلارى» پارتياسى جەتەكشىلىك ەتەتىن باسقارۋشى كواليتسيانىڭ باستى مىندەتتەرىنىڭ ءبىرى. ءبىراق بيلىكتىڭ ادىستەرى، اسىرەسە ولاردىڭ تۇسىك جاساتۋ تۋرالى ازىرلەپ وتىرعان زاڭ جوباسى الەۋمەتتانۋشىلار مەن جەرگىلىكتى ۇكىمەتتىك ەمەس ۇيىمداردىڭ سىنىنا جانە كوپتەگەن سۇراقتارىنا سەبەپ بولىپ وتىر.

مۇنى دەموگرافيالىق ماسەلەلەرگە ارنالعان ريمدە وتكەن ەكى كۇندىك كونفەرەنتسيا ايقىن كورسەتتى. قاتىسۋشىلار ەلدە «توتەنشە جاعداي» ەكەنىنە كەلىستى.

ەگەر بۇل ءۇردىس جالعاسا بەرسە، 2030 -جىلعا قاراي يتاليانىڭ 59 ميلليون حالقى شامامەن 1 ميلليون ادامعا ازايادى دەگەن بولجام بار.

يتاليانىڭ ۇلتتىق ستاتيستيكالىق باسقارماسىنىڭ (ISTAT) مالىمەتىنشە، ەگەر 2022 -جىلى تۋۋدىڭ جالپى كوەففيسيەنتى (ياعني، ءبىر ايەلگە شاققانداعى بالا سانى) 1,24 بولسا، ءبىر جىلدان كەيىن ول 1,2 گە دەيىن تومەندەدى.

ال حالىقتىڭ قارتايۋى زەينەتاقى جۇيەسى مەن دەنساۋلىق ساقتاۋ سالاسىنا اۋىر سالماق ءتۇسىرىپ وتىر.

«يتالياداعى جاعدايدىڭ باستى ەرەكشەلىگىنىڭ ءبىرى - داعدارىستىڭ ۇزاق جىلدارعا سوزىلۋى. 2008 -جىلدان بەرى جاڭا تۋعان نارەستەلەر سانى 200 مىڭعا ازايعان. كوپ جاعدايدا بۇل الەۋەتتى اتا-انالار سانىنىڭ ازايۋىنا بايلانىستى. بۇل 30 جىل بۇرىن باستالعان تۋۋ كورسەتكىشىنىڭ تومەندەۋىمەن تۇسىندىرىلەدى»، - دەپ اتاپ ءوتتى ISTAT باس ديرەكتورى سابرينا پراتي.

وتكەن جىلى ەل ۇكىمەتى ايەلدەرگە بالا تاربيەسى مەن جۇمىستى قاتار جۇرگىزۋگە كومەكتەسەتىن شارالارعا شامامەن 1 ميلليارد ەۋرو ءبولدى.

بۇعان دەيىن حابارلاعانىمىزداي، يتاليا پارلامەنتى الدىندا جينالعان نارازىلىق بىلدىرۋشىلەر جۇكتىلىكتى توقتاتۋ ورتالىقتارىنا انا ماسەلەلەرى جونىندەگى كەڭەسشىلەردى ەنگىزۋدى كوزدەيتىن جاساندى تۇسىك تۋرالى زاڭ جوباسىن قابىلداۋعا قارسى.

اۆتور
زارينا تۋعانبايەۆا

سوڭعى جاڭالىقتار