يتاليادا الەمدەگى ەڭ ۇلكەن اسپالى كوپىر سالىنادى
استانا. KAZINFORM - يتاليا ۇكىمەتى سيتسيليا مەن كالابريا وڭىرلەرىنىڭ وقشاۋلانۋ ماسەلەسىن شەشۋگە باعىتتالعان، الەمدەگى ەڭ ۇلكەن اسپالى كوپىر جوباسىن جۇزەگە اسىرۋعا نيەتتى ەكەنىن مالىمدەدى، دەپ حابارلايدى AZƏRTAC.
جوبانىڭ بولجامدى قۇنى - 13,5 ميلليارد ەۋرو، ال كوپىردىڭ نەگىزگى ارالىعى - 3,3 شاقىرىم بولماق. بۇل كورسەتكىشپەن ول الەمدەگى ەڭ ۇزىن اسپالى كوپىر اتانۋى مۇمكىن. جوبا 150 جىلدان بەرى تالقىلانىپ كەلەدى، الايدا ناقتى ىسكە اسۋى ءالى كۇنگە دەيىن باستالماعان. كوپىردىڭ جوسپارلانعان ورنى - ينجەنەرلىك تۇرعىدا كۇردەلى ايماق سانالاتىن مەسسين بۇعازى. مۇندا ساعاتىنا 100 شاقىرىمعا دەيىن جەتەتىن جەل سوعىپ تۇرادى، سەيسميكالىق بەلسەندىلىك تە جوعارى.
يتاليانىڭ ينفراقۇرىلىم ءمينيسترى ماتتەو سالۆيني جاڭا تەحنولوگيالار ارقىلى وسى قاۋىپتەردى ەڭسەرۋگە بولاتىنىن ايتىپ وتىر. ونىڭ ايتۋىنشا، جوبا ءساتتى اياقتالسا، بۇل يتاليانىڭ كولىك بايلانىسىندا ناعىز «ريەۆوليۋتسيا» بولادى.
ۇكىمەتتىڭ بولجامىنشا، سيتسيليا مەن كالابريانىڭ ماتەريكتەن وقشاۋلانۋى يتاليا ەكونوميكاسىنا جىل سايىن 6,5 ميلليارد ەۋروعا شىعىن كەلتىرەدى. سونىمەن قاتار، جوبا 120 مىڭ جۇمىس ورنىن اشۋى مۇمكىن. الايدا تاۋەلسىز ساراپشىلار ناقتى جۇمىس ورىندارىنىڭ سانى جىلىنا 2- 3 مىڭنان اسپاۋى مۇمكىن ەكەنىن ايتادى.
ەكولوگتار جوبانىڭ تەڭىز ەكوجۇيەسى مەن قۇستاردىڭ كوشۋ جولدارىنا ءقاۋىپ توندىرەتىنىن ەسكەرتىپ وتىر. ال «No Ponte» قوزعالىسىنىڭ بەلسەندىلەرى بۇل باستامانى يتاليانىڭ وڭتۇستىگىندەگى ينفراقۇرىلىم، دەنساۋلىق ساقتاۋ جانە ءبىلىم بەرۋ ماسەلەلەرى شەشىلمەي تۇرعان كەزدە - بوسقا كەتەتىن قاراجات دەپ سانايدى.
مينيستر سالۆينيدىڭ ايتۋىنشا، ەگەر پرەمەر- مينيستر دجوردجيا مەلوني باسقاراتىن ۇكىمەت ايدىڭ سوڭىنا دەيىن جوبانى رەسمي تۇردە بەكىتسە، بۇل ەۋروپاداعى ەڭ اۋقىمدى قۇرىلىس باستامالارىنىڭ ءبىرى بولماق.
دەگەنمەن تاريح بۇل باعىتتا اباي بولۋدى ۇيرەتەدى: وسىعان دەيىنگى 12 تالپىنىستىڭ بارلىعى كەيىنگە شەگەرىلىپ، كەيبىرى مۇلدەم توقتاتىلعان، ونىڭ ىشىندە 2012 -جىلعى قارىز داعدارىسى كەزىندەگى جوبا دا بار.
پرەزيدەنت قازاقستان- يتاليا ستراتەگيالىق سەرىكتەستىگى بارلىق باعىتتا سەرپىندى دامىپ وتىر دەگەن ەدى.
