يتاليا پرەمەرى قازاقستانعا رەسمي ساپارمەن كەلدى
استانا. KAZINFORM - بۇل تۋرالى اقوردانىڭ باسپا ءسوز قىزمەتى حابارلادى.
- مەملەكەت باسشىسى قازاقستانعا رەسمي ساپارمەن كەلگەن يتاليا پرەمەر-ءمينيسترى دجوردجا مەلونيدى ەلوردا اۋەجايىنان قارسى الدى، - دەلىنگەن حابارلامادا.
ەسكە سالساق، قاڭتار ايىندا قازاقستان پرەزيدەنتى يتاليا مينيسترلەر كەڭەسىنىڭ ءتوراعاسى دجوردجا مەلونيمەن كەزدەسكەن ەدى. مەملەكەتارالىق ىنتىماقتاستىقتى جوعارى دەڭگەيدە ساقتاۋ ءۇشىن قاسىم-جومارت توقايەۆ دجوردجا مەلونيدى استاناعا رەسمي ساپارمەن كەلۋگە شاقىردى.
كەيىننەن پرەزيدەنت قاسىم-جومارت توقايەۆتىڭ شاقىرۋىمەن 26-27-ءساۋىر كۇندەرى يتاليا پرەمەر-ءمينيسترى دجوردجا مەلوني قازاقستانعا رەسمي ساپارمەن كەلەتىنى انىقتالدى.
الايدا ساۋىردە يتاليا پرەمەر-ءمينيسترىنىڭ قازاقستانعا جوسپارلانعان ساپارى كەيىنگە شەگەرىلدى. وعان سەبەپ يتاليا ۇكىمەتىنىڭ باسشىسى دجوردجا مەلوني ريم پاپاسى فرانتسيسكتى جەرلەۋ راسىمىنە قاتىساتىن بولدى.
جاقىندا ەلوردادا وتكەن «يتاليا - قازاقستان» ىسكەرلىك فورۋمىندا ەكى ەلدىڭ ۇيىمدارى جالپى سوماسى 180 ميلليون ەۋرو بولاتىن 10 مەموراندۋمعا قول قويدى.
