ىستانبۇلدا جاڭا مەر سايلاندى

استانا. قازاقپارات - ىستانبۇل قالالىق مۋنيتسيپاليتەت ءماجىلىسى ۋاقىتشا ىستامبۇل مەرىنىڭ مىندەتىن اتقارۋشى ەتىپ وپپوزيتسيالىق حالىقتىق- رەسپۋبليكالىق پارتيانىڭ ءتوراعاسى نۋري اسلاندى سايلادى. ونىڭ كانديداتۋراسى داۋىس بەرۋ ارقىلى تەك ءۇشىنشى كەزەڭدە بەكىتىلدى.

ىستانبۇل مەرياسى الدىنداعى شەرۋلەر توقتادى. بۇل تۋرالى وپپوزيتسيالىق «رەسپۋبليكالىق حالىق پارتياسىنىڭ» باسشىسى وزگۇل وزەل مالىمدەدى. ونىڭ ايتۋىنشا، ەندىگى نارازىلىق اكسياسى سەنبى كۇنى شاھاردىڭ ازيا بولىگىندەگى مالتەپە الاڭىندا «ەكرەم يماموگلۋ بوستاندىققا شىقسىن» دەگەن ۇرانمەن وتەدى. سول جەردە وپپوزيتسيالىق پارتيا پرەزيدەنتتىككە ۇمىتكەرىن جاريالايدى. ول - قاماۋعا الىنعان ەكرەم يماموگلۋدىڭ سەنىمدى سەرىگى.

نۋري اسلان، ىستانبۇل مەرىنىڭ مىندەتىن اتقارۋشى:

- بىزدەر ەكرەم يماموگلۋدىڭ جولداستارى رەتىندە ۋاقىتشا ونىڭ اماناتىن الدىق. ىستانبۇل حالقىنىڭ داۋىسىمەن سايلانعان بۇرىنعى مەر كوپ ۇزاماي ارامىزعا قايتا قوسىلادى. ونىڭ اماناتىنا جاۋاپكەرشىلىكپەن قارايمىز.

ىستانبۇل مەرياسى ورنالاسقان ساراچحانەدەگى نارازىلىق شەرۋلەرى اياقتالدى. وپپوزيتسيالىق «رەسپۋبليكالىق حالىق پارتياسى» جەتەكشىسىنىڭ سوزىنشە، شەرۋ توقتاعانىمەن قارسىلىق پەن كۇرەس جالعاسادى.

وزگۇل وزەل، «رەسپۋبليكالىق حالىق پارتياسىنىڭ» جەتەكشىسى:

- ساراچحانەنى، شىنايى ىستانبۇلدى، ەكرەم يماموگلۋدىڭ اتىنان نۋري اسلانعا تاپسىرامىن. ەندىگى شەرۋدى جۇما كۇنى ەڭبەك ۇيىمدارىنىڭ قاتىسۋىمەن باستايمىن. ال سەنبى كۇنى مالتەپەدە ميلليونداعان كىسىمەن بىرگە ەكرەم يماموگلۋدىڭ بوستاندىققا شىعۋىن تالاپ ەتىپ، پرەزيدەنتتىككە ۇمىتكەرىمىزدىڭ ەسىمىن جاريالايتىن ميتينگتە كەزدەسەمىز.

تۇركياداعى جاپپاي تارتىپسىزدىكتەرگە بايلانىستى ءبىر جارىم مىڭداي ادام قاماۋعا الىندى. ەل پرەزيدەنتى: «تۇركيا ەكونوميكاسىنا قارسى جاسالعان كەز كەلگەن سابوتاج سوت الدىندا سۇرالادى»، - دەدى.

رەجەپ تايپ ەردوعان، تۇركيا پرەزيدەنتى:

- بۇدان بىلاي تۇرىك ەكونوميكاسىنا، ۇلتتىڭ ءال-اۋقاتى مەن تىنىشتىعىنا قارسى جاسالعان كەز كەلگەن ارەكەتكە سوت ارقىلى باعا بەرىلەدى. وتانعا وپاسىزدىق جاساپ، ۇلت بىرلىگىنە سىزات تۇسىرگەندەر ادىلەت الدىندا جاۋاپ بەرەدى. بۇل ريەۆانشيزم ەمەس. ۇلت بولىپ ۇيىسۋدىڭ، مەملەكەتتى ساقتاپ قالۋدىڭ نەگىزگى شارتى.

ەستەرىڭىزگە سالا كەتەيىك، نارازىلىق شەرۋلەرىنىڭ باستالۋىنا ىستانبۇل مەرى ەكرەم يماموگلۋدىڭ قاماۋعا الىنۋى سەبەپ بولدى. ول وتكەن اپتادا جەمقورلىق جاسادى جانە لاڭكەستىك ۇيىمعا قولداۋ ءبىلدىردى دەگەن كۇدىككە ءىلىنىپ، قىزمەتىنەن شەتتەتىلگەن بولاتىن. قازىر قاماۋدا وتىر. سول پروتسەسى جالعاسىپ جاتىر.

https://24.kz/