يسلانديادا جانارتاۋ اتقىلاپ، ءبىر شاقىرىمدىق جارىق پايدا بولدى
استانا. KAZINFORM - يسلانديا استاناسى رەيكياۆيك قالاسىنا جاقىن ماڭدا سۋندحنۋكۋر جانارتاۋى اتقىلادى، دەپ حابارلايدى ازەرتادج.
بۇل سولتۇستىك اتلانتيكاداعى ارال ەلىندە 2021 -جىلدان بەرى تىركەلگەن 12-جانارتاۋ اتقىلاۋى بولىپ وتىر، دەپ حابارلايدى يسلانديانىڭ مەتەورولوگيالىق باسقارماسى.
اگەنتتىك شەتەلدىك ب ا ق- قا سىلتەمە جاساپ حابارلاعانداي، باسقارما تاراتقان مالىمەتكە سايكەس، يسلانديانىڭ وڭتۇستىك-باتىسىندا پايدا بولعان جارىقتىڭ ۇزىندىعى 700 دەن 1000 مەترگە دەيىن جەتەدى.
- لاۆا نەگىزىنەن وڭتۇستىك- شىعىس باعىتتا اعىپ جاتىر جانە ينفراقۇرىلىم نىساندارىنا ءقاۋىپ ءتوندىرىپ تۇرعان جوق. GPS ولشەمدەرى مەن جەر قىرتىسىنىڭ دەفورماتسيا بەلگىلەرىنە قاراعاندا، بۇل سالىستىرمالى تۇردە شاعىن كولەمدەگى اتقىلاۋ بولۋى مۇمكىن، - دەلىنگەن باسقارما حابارلاماسىندا.
تىكەلەي ەفيردە اسپانعا اتىلعان لاۆا مەن ءتۇتىن اعىندارى انىق كورىندى.
قازىر كوك لاگۋنا دەپ اتالاتىن ايگىلى گەوتەرمالدىق كۋرورتتان جانە جاقىن ماڭداعى گرينداۆيك اتتى بالىقشىلار قالاشىعىنان ادامدار قاۋىپسىز جەرگە ەۆاكۋاتسيالاندى. سارسەنبى كۇنى بولعان بۇل اتقىلاۋ - ورتالىق كراتەردەن ەمەس، جەر قىرتىسىنداعى ۇزىن جارىقتار ارقىلى لاۆا اعۋمەن سيپاتتالاتىن جارىقتىق جانارتاۋ اتقىلاۋىنىڭ ءبىر ءتۇرى.
بۇعان دەيىن يسلانديانىڭ وڭتۇستىك- باتىس بولىگىندەگى رەيكيانەس تۇبەگىندە ورنالاسقان سۋندحنۋكۋر جانارتاۋى ءساۋىر ايىندا اتقىلاعانى حابارلانعان ەدى.
