يسپانيادا ەتنيكالىق قاقتىعىس ءورشي ءتۇستى
مادريد. KAZINFORM - يسپانيانىڭ وڭتۇستىگىندەگى توررە- پاچەكو قالاسىندا راديكالدى كوزقاراستاعى جەرگىلىكتى تۇرعىندار مەن ميگرانتتار اراسىندا قاقتىعىستار ءالى جالعاسىپ جاتىر، دەپ جازدى ت ا س س.
قوعامدىق ءتارتىپتى گراجدان گۆاردياسى (ازاماتتىق گۆارديا) قامتاماسىز ەتىپ جاتىر. بۇل تۋرالى La Verdad باسىلىمى دەرەككوزدەرگە سىلتەمە جاساپ حابارلادى.
- ادامداردىڭ جينالۋى ەكى لاگەردىڭ قاقتىعىسىنا ۇقساپ تۇردى، ولاردىڭ اراسىنا گراجدان گۆاردياسى ۇنەمى كەدەرگى جاساپ، قىرعىن مەن اۋىر جاراقاتتاردىڭ الدىن الۋعا تىرىستى، - دەپ ءتۇسىندىردى جاعدايدى ۇكىمەت وكىلى ماريولا گيەۆارۋ.
گازەتتە بەرىلگەن دەرەككە سايكەس، جەرگىلىكتى تۇرعىنعا جاسالعان شابۋىلدان كەيىن راديكالدى توپتار ميگرانتتاردى ىزدەۋگە كىرىسكەن، ولاردىڭ تۇراتىن جەرلەرىنە بارىپ، قۋعىن ۇيىمداستىرعان. بۇل ميگرانتتار تاراپىنان جاۋاپ ارەكەتكە اكەلىپ، سوڭى قاقتىعىسقا ۇلاسقان. وقيعا بارىسىندا بىرنەشە ادام ۇستالىپ، زارداپ شەككەندەر بار.
ماريولا گيەۆارۋ ۆالەنسيا بيلىگىنەن تارتىپسىزدىكتەرگە قارسى كۇرەس بولىمشەسىن توررە- پاچەكوعا جىبەرۋدى سۇرادى. ونىڭ ايتۋىنشا، قالانىڭ ءاربىر كوشەسى قاۋىپسىزدىك كۇشتەرى تاراپىنان باقىلاۋدا، ال وقيعا بويىنشا تەرگەۋ جۇرگىزىلىپ جاتىر.
بۇعان دەيىن، 8-ماۋسىم كۇنى، يسپانيادا ۇكىمەتكە قارسى مىڭداعان ادام قاتىسقان نارازىلىق شەرۋى وتكەن بولاتىن. بۇل شارانى وپپوزيتسيالىق كونسەرۆاتيۆتىك حالىق پارتياسى ۇيىمداستىرعان.
ەسكە سالا كەتەيىك، بۇعان دەيىن يتاليا مەن يسپانيادا قىزىل دەڭگەيلى دابىل جاريالانعانىن جازعان ەدىك.
يسپانيانىڭ ۇلتتىق مەتەورولوگيالىق اگەنتتىگى AEMET ماۋسىم ايى تاريحتاعى ەڭ ىستىق اي بولۋى مۇمكىن دەپ ەسكەرتكەن ەدى. سيەۆيليا مەن ەلدىڭ وڭتۇستىگىندەگى باسقا قالالاردا اۋا تەمپەراتۋراسى 42°C قا دەيىن كوتەرىلەتىنى حابارلانعان بولاتىن.
