يسپانيادا قارلاگ تۇتقىندارى تۋرالى فيلم تۇسىرىلە باستادى
استانا. قازاقپارات - قازاقستان مەن يسپانيا قارلاگ تۇتقىندارىنىڭ تاعدىرى تۋرالى بىرلەسكەن فيلم تۇسىرە باستادى، دەپ حابارلايدى 24kz.
«ءبىتىم» دەگەن شارتتى اتاۋى بار كارتينا بيلباو قالاسىندا قولعا الىندى. جوباعا «قاعاز ءۇي» سەريالىمەن دۇنيەجۇزىنە تانىلعان رەجيسسەر ميگەل انحەل ۆيۆاس جەتەكشىلىك ەتەدى. تۇسىرىلىمگە يسپانيا مەن قازاقستاننىڭ كينوجۇلدىزدارى تارتىلعان. وسىلايشا، ەۋروپا ەلىنىڭ سولتۇستىگىندەگى تاۋدا كىشىگىرىم قارلاگ پايدا بولدى. تۋرا سول تۇرمەدەگىدەي ينفراقۇرىلىم جاساقتالعان.
ميگەل انحەل ۆيۆاس، رەجيسسەر:
- قازاقستان مادەنيەتىن سەزىنۋ جانە وسى ەلدەگى ادامداردىڭ ناعىز تۇرمىس-تىرشىلىگىن كورسەتۋ مۇمكىندىگىنە يە بولۋ - عاجاپ نارسە. فيلمدە اۋىل ادامدارى قازاققا ءتان قوناقجايلىلىقپەن شەتەلدىك قوناقتاردى داستارحانعا شاقىراتىن كورىنىس بار. وسىلايشا، ءبىز دە كورەرمەندى باسقا مادەنيەتپەن تانىسۋعا شاقىرامىز. كارتينادا تاريحي وقيعالار ارقىلى ادامداردىڭ تاعدىرى كورسەتىلەدى. يدەولوگيالىق الاۋىزدىق جىك-جىككە بولگەن وتانداستاردى ورتاق قاسىرەت بىرىكتىرەدى. بۇعان دەيىن قارلاگتاعى يسپاندار تۋرالى الەمدىك دەڭگەيدە كينو تۇسىرىلمەگەن ەكەن.
امانات قوناقبايەۆ، فيلمنىڭ باس پروديۋسەرى:
- ءبىزدىڭ ماقساتىمىز - بۇكىل الەمدەگى ادامداردىڭ جۇرەگىن جاۋلاپ الاتىن فيلم ءتۇسىرۋ. سونداي-اق ءبىز ءارتۇرلى ادامدار، ءارتۇرلى ەلدەر اراسىنداعى بارلىق تاريحتى كورسەتكىمىز كەلەدى.
بىرلەسكەن جوبانىڭ دۇنيەگە كەلۋىنە شىعارماشىلىق قىزىعۋشىلىق سەبەپ بولعان. ەلىمىزدىڭ كينەماتوگرافيستەرى وتە قۇندى حالىقارالىق تاجىريبە جيناپ جاتىر. الەمدىك الاڭداعى «جۇمساق كۇش» - كينو ارقىلى كورەرمەندەر قازاقستانمەن جاقىنىراق تانىسادى.
ەرلان بەكحوجين، فيلمنىڭ باس پروديۋسەرى:
- ءبىزدىڭ كينوكارتينا الەمدەگى ميلليونداعان ادامعا قازاقستان تاريحى، ونىڭ كوپقىرلى مادەنيەتى، ورتاق قۇندىلىقتار مەن ورتاق تاريحي جادى جايىندا كوبىرەك بىلۋگە كومەكتەسەدى دەپ سەنەمىن. فيلمدە قازاق ءتىلى دە قولدانىلادى. ۇلتتىق اسپابىمىز پاش ەتىلەدى. كينودا قازاق حالقى باسقا ۇلتتاردىڭ وكىلدەرىن باۋىرىنا باسقانى ايتىلادى. يسپان تاۋلارىندا قازاق دالاسىن بەينەلەۋ وڭايعا سوققان جوق. لوگيستيكاعا كوپ ءمان بەرىلدى. شىنايى جاعدايدى تۋرا ەلەستەتەتىن دەكوراتسيالار جاسالدى.
سەزار بەنيتەس، Plano A Plano كينوكومپانياسىنىڭ ديرەكتورى:
- بارلىق جاعدايدى، قازاق دالاسىن ءدال بەرۋ مۇمكىن ەمەس ەكەنىن بىلەمىز. ءبىراق بار كۇشىمىزدى سالدىق. ءبىزدىڭ توبىمىز وتە كوپ قۇجاتپەن تانىستى، قويۋشى- سۋرەتشىلەر وتە اۋقىمدى جۇمىس اتقاردى. ۇلكەن سىناقتان وتتىك.
«ءبىتىم» فيلمىن ءتۇسىرۋ توبى الەمدىك دەڭگەيدەگى كينو ۇسىنۋ ماقساتىن جاسىرمايدى. ولار «ا» ساناتىنداعى فەستيۆالدەر مەن ءارتۇرلى ەلدەردىڭ كينوپروكاتىنا ىلىكسەك دەيدى. قازىردىڭ وزىندە «نەتفليكسپەن» كەلىسىمشارتقا وتىرعان.
