يسپانيا يرانعا قارسى امەريكالىق ۇشاقتار ءۇشىن اۋە كەڭىستىگىن جاپتى

استانا. KAZINFORM - يسپانيا يرانعا قارسى ا ق ش وپەراتسيالارىنا بايلانىستى ءوز اۋە كەڭىستىگى مەن اسكەري بازالارىن پايدالانۋعا شەكتەۋ ەنگىزدى. بۇل شەشىم قاقتىعىستىڭ ۋشىعۋىن بولدىرماۋعا باعىتتالعان، دەپ حابارلايدى BBC.

ەل پرەمەر-ءمينيسترى پەدرو سانچەس سوعىس باستالعالى بەرى ا ق ش پەن يزرايلدىڭ سوققىلارىن زاڭسىز دەپ اتاپ، مادريدتىڭ بۇل قاقتىعىسقا قاتىسپايتىنىن بىرنەشە رەت مالىمدەگەن. قابىلدانعان شەكتەۋلەر امەريكالىق اسكەري اۆياتسيانىڭ تاياۋ شىعىسقا ۇشۋىن قيىنداتقانىمەن، تولىق توقتاتپايدى.

- يرانداعى سوعىسقا قاتىستى قانداي دا ءبىر ارەكەتتەر ءۇشىن مورون مەن روتا اسكەري بازالارىن پايدالانۋعا رۇقسات بەرمەيمىز، - دەدى يسپانيانىڭ قورعانىس ءمينيسترى مارگاريتا روبلەس.

ونىڭ ايتۋىنشا، مادريد بۇل ۇستانىمىن ا ق ش ۇكىمەتىنە باستاپقى كەزەڭنەن-اق اشىق جەتكىزگەن.

ەلدىڭ سىرتقى ىستەر ءمينيسترى حوسە مانۋەل البارەس مۇنداي شەكتەۋلەردىڭ ماقساتى - قاقتىعىستىڭ ودان ءارى ۋشىعۋىنا اكەلۋى مۇمكىن ارەكەتتەردىڭ الدىن الۋ ەكەنىن ايتتى.

ا ق ش تاراپى بۇل مالىمدەمەلەرگە ازىرگە پىكىر بىلدىرگەن جوق. الايدا بۇعان دەيىن ا ق ش پرەزيدەنتى دونالد ترامپ يسپانيانىڭ يرانعا قارسى سوعىسقا قاتىستى ۇستانىمىنا بايلانىستى تولىق ساۋدا ەمبارگوسىن ەنگىزۋى مۇمكىن ەكەنىن ەسكەرتكەن بولاتىن.

اقپان ايىنىڭ سوڭىندا باستالعان ا ق ش پەن يزرايلدىڭ يرانعا قارسى اسكەري قيمىلدارىنا قاتىستى پەدرو سانچەس ەڭ بەلسەندى سىن ايتۋشىلاردىڭ ءبىرى بولدى. ول بۇل سوققىلاردى «ويلانباي جاسالعان» ءارى «زاڭسىز» دەپ باعالادى.

ناۋرىز ايىندا يسپانيا ا ق ش-قا اندالۋسيا وڭىرىندە ورنالاسقان روتا جانە مورون-دە-لا-فرونتەرا اسكەري بازالارىن پايدالانۋعا رۇقسات بەرمەگەنى حابارلانعان.

وتكەن سارسەنبىدە سانچەس يرانداعى وپەراتسيالارعا قاتىستى بارلىق ۇشۋ جوسپارلارى، ونىڭ ىشىندە اۋەدە جانارماي قۇيۋعا ارنالعان ۇشاقتاردىڭ رەيستەرى دە كەرى قايتارىلعانىن مالىمدەدى.

وسىعان دەيىن يسپانيانىڭ ا ق ش تاراپىنان جاسالعان قوقان-لوقىعا جاۋاپ بەرگەنى تۋرالى جازدىق.