ەگيس كليماس: قازاقستان بوكسشىلارىن قولداۋعا دايىنبىز

استانا. KAZINFORM - تانىمال كاسىپقوي بوكس مەنەدجەرى ەگيس كليماس استانادا وتكەن جانىبەك-اناۋەل ايقاسى الدىنداعى باسپا ءسوز كونفەرانتسياسىندا بولاشاقتا قازاقستاندىق بوكسشىلارمەن جۇمىس ىستەۋگە دايىن ەكەنىن ايتتى.

ەگيس كليماس قازاقستاندىقتارعا سالەم جولداپ، ىستىق ىقىلاسپەن قارسى العانى ءۇشىن العىس ايتتى.

- بارشاڭىزعا قايىرلى كۇن! اسەم استاناعا تاعى كەلگەنىمە قۋانىشتىمىن. ىستىق ىقىلاستارىڭىز ءۇشىن كوپ راقمەت. بۇل مەنىڭ قازاقستانعا ءبىرىنشى رەت كەلۋىم ەمەس، ەلدەرىڭىزدە كوپ بولدىم، وسىندا تانىستارىم دا كوپ، - دەدى ول.

تانىمال مەنەدجەر بۇل كۇندە قازاقستاندىق تانىمال بوكسشىلارمەن جۇمىس ىستەپ جاتىر.

- ءيا، مەن كوپتەگەن قازاقستاندىق تالانتتى بوكسشىلارمەن جۇمىس ىستەدىم. ولاردىڭ قاتارىندا ماديار اشكەيەۆ، قانات يسلام، جانىبەك ءالىمحان ۇلى جانە مەيىرىم نۇرسۇلتانوۆ بار. ولار - مىقتى بوكسشىلار. الداعى ۋاقىتتا جۇمىس اتقارۋعا دايىنبىز. ەگەر باسقا دا جاقسى بوكسشىلار بولىپ جاتسا، ءبىز ولاردى قولدايمىز، - دەدى ەگيس.

ەسكە سالا كەتسەك، جانىبەك ءالىمحان ۇلى 5-ءساۋىر كۇنى استانا قالاسىندا كەزەكتى جەكپە-جەگىن وتكىزىپ، چەمپيوندىق بەلدىكتەرىن قورعايدى. كاسىپقوي بوكس كەشى ەلورداداعى «بارىس ارەنا» سپورت كەشەنىندە وتەدى.

وسىعان دەيىن حابارلاعانىمىزداي، قازاقستاندىق كاسىپقوي بوكسشى سۇلتان زاۋربەك (19-0، 13 ك و) بولاشاقتا تانىمال بريتانيالىق Matchroom Boxing پروموۋتەرلىك كومپانياسىمەن كەلىسىمشارت جاساسۋى مۇمكىن.