يراننىڭ يادرولىق نىسانى ىستەن شىقتى
استانا. KAZINFORM - يراننىڭ حونداب قالاسىنداعى اۋىر سۋ ءوندىرۋ زاۋىتى زاقىمدانىپ، ىستەن شىقتى.
بۇل تۋرالى حالىقارالىق اتوم ەنەرگياسى اگەنتتىگى (ماگاتە) حابارلادى.
- سپۋتنيكتىك سۋرەتتەر مەن قوندىرعى تۋرالى اقپاراتتىڭ تاۋەلسىز تالداۋىنا سۇيەنە وتىرىپ، ماگاتە يران 27 - ناۋرىزدا شابۋىل جاسالعانىن حابارلاعان حوندابتاعى اۋىر سۋ ءوندىرۋ زاۋىتىنىڭ قاتتى زاقىمدانعانىن جانە ەندى جۇمىس ىستەمەيتىنىن راستادى، - دەلىنگەن ماگاتە الەۋمەتتىك جەلىلەردەگى مالىمدەمەسىندە.
27-ناۋرىزدا يزرايل اسكەري كۇشتەرى يراننىڭ ورتالىعىنداعى اۋىر سۋ رەاكتورى مەن ۋران وڭدەۋ زاۋىتىنا سوققى بەرگەنىن راستادى.
- يزرايل اۋە كۇشتەرى يران ورتالىعىنداعى اراكتاعى اۋىر سۋ ءوندىرۋ زاۋىتىنا سوققى بەردى، - دەلىنگەن اسكەري كۇشتەر مالىمدەمەسىندە نىساندى «يادرولىق قارۋعا ارنالعان پلۋتونيي ءوندىرۋدىڭ نەگىزگى نىسانى» دەپ سيپاتتاپ.
يراندىق اقپارات قۇرالدارى ا ق ش- يزرايل شابۋىلدارى حوندابتاعى اۋىر سۋ ءوندىرۋ كەشەنىنە باعىتتالعانىن حابارلاپ، نىساننان ەشكىم قازا تاپپاعانىن نەمەسە رادياتسيالىق اعۋلار بولماعانىن مالىمدەدى، دەپ حابارلايدى Al Arabiya English.
رەسمي تۇردە زەرتتەۋ رەاكتورى مەديتسينالىق زەرتتەۋلەر ءۇشىن پلۋتوني وندىرۋگە ارنالعان، ال كەشەندە اۋىر سۋ ءوندىرۋ زاۋىتى دا ورنالاسقان.
بۇعان دەيىن ماگاتە يرانداعى ا ە س ماڭىنداعى سوققىلار يادرولىق قاۋىپ ءتوندىرۋى مۇمكىن ەكەنىن ەسكەرتكەن.
