يراننان تۇرىكمەنستان ارقىلى 100 دەن استام ادام شىقتى: اراسىندا قازاقستاندىقتار دا بار
استانا. KAZINFORM - تۇرىكمەنستان يراننان كەلگەن شەتەل ازاماتتارىنا گۋمانيتارلىق كومەك كورسەتىپ جاتىر. بۇل تۋرالى تۇرىكمەنستان سىرتقى ىستەر مينيسترلىگىنىڭ باسپا ءسوز قىزمەتى حابارلادى.
تاياۋ شىعىستا قالىپتاسقان جاعدايعا بايلانىستى تۇرىكمەنستان ءوز اۋماعىن شەتەلدىك ديپلوماتتار مەن ولاردىڭ وتباسى مۇشەلەرىنىڭ، سونداي-اق قازىرگى ۋاقىتتا يران اۋماعىندا جۇرگەن باسقا دا ازاماتتاردىڭ ەلدەن شىعۋىنا مۇمكىندىك بەرۋ ءۇشىن شۇعىل شارالار قابىلداپ جاتىر.
- بۇگىنگى كۇنگى مالىمەت بويىنشا، تۇرىكمەنستاننىڭ مەملەكەتتىك شەكاراسىن باقىلاۋ- وتكىزۋ بەكەتتەرى ارقىلى قازاقستان، قىرعىزستان، وزبەكستان، تاجىكستان، رۋمىنيا جانە باسقا ەلدەردىڭ شامامەن 120 ازاماتى ءوتتى، - دەلىنگەن حابارلامادا.
كەلگەن ازاماتتارعا اۆتوكولىك، تاماق، قوناق ۇيلەر مەن العاشقى قاجەتتى زاتتار بەرىلدى.
گۋمانيتارلىق ميسسيانى جۇزەگە اسىرۋ اياسىندا تۇرىكمەنستاننىڭ ءتيىستى مەملەكەتتىك ورگاندارى شەتەل مەملەكەتتەرىنىڭ ديپلوماتيالىق ميسسيالارىمەن جانە حالىقارالىق ۇيىمدارمەن تىعىز ىنتىماقتاستىق ورناتقان.
بۇل تۇرعىدا تۇرىكمەنستان گۋمانيزم، حالىقارالىق ىنتىماقتاستىق جانە تاتۋ كورشىلىك قاعيداتتارىنا بەرىك ەكەنىن ناقتى ءىس جۇزىندە دالەلدەپ وتىر. بۇل اسىرەسە ب ۇ ۇ باس اسسامبلەياسى تۇرىكمەنستاننىڭ باستاماسىمەن جاريالاعان بەيبىتشىلىك پەن سەنىمنىڭ حالىقارالىق جىلى جاعدايىندا اسا ماڭىزدى.
ايتا كەتەلىك يران يزرايلگە تاعى دا زىمىران جىبەرگەن ەدى.
