يراندى ەشكىم شەگىنۋگە ماجبۇرلەي المايدى - ەلدىڭ جوعارعى كوشباسشىسى ترامپقا جاۋاپ بەردى

استانا. KAZINFORM - اياتوللا حامەنەي يراننىڭ تاڭىلعان سوعىسقا دا، تاڭىلعان بەيبىتشىلىككە دە كونبەيتىنىن ايتتى، دەپ حابارلايدى Kazinform ءتىلشىسى.

يران يسلام رەسپۋبليكاسىنىڭ رۋحاني جەتەكشىسى اياتوللا سەيەد ءالي حامەنەي سارسەنبى كۇنى تەلەديدار ارقىلى سويلەگەن سوزىندە ا ق ش-قا يرانعا قارسى اسكەري قيمىلدار باستالسا، زاردابى اۋىر بولاتىنىن ەسكەرتتى.

ونىڭ مالىمدەمەسى ا ق ش پرەزيدەنتى دونالد ترامپتىڭ تەگەراننان «شەگىنۋدى» تالاپ ەتكەن قوقان-لوققىسىنان كەيىن جاسالدى.

- امەريكالىقتار يرانعا قارسى كەز كەلگەن اسكەري ارالاسۋ ولارعا ورنى تولماس زالال اكەلەتىنىن ءتۇسىنۋى كەرەك. ءبىز تاڭىلعان سوعىسقا بەرىلمەيمىز جانە تاڭىلعان بەيبىتشىلىكتى قابىلدامايمىز. ەشكىم يراندى شەگىنۋگە ماجبۇرلەي المايدى، - دەدى حامەنەي.

راحبار اق ءۇي باسشىسىنىڭ قوقان-لوققىسىن ايىپتاپ، ونى «دورەكى» ءارى «قابىلدانبايتىن» دەپ اتادى.

ول «يران تاريحىنان حابارى بار دانا ادام» ەشقاشان تەگەرانعا ۋلتيماتۋم تىلىمەن جۇگىنبەيتىنىن اتاپ ءوتتى.

- يران حالقى كۇشتەۋمەن بەرىلەتىن حالىق ەمەس. ءبىز تاۋەلسىزدىگىمىزدى، قاۋىپسىزدىگىمىز بەن ابىرويىمىزدى قورعاۋدا تاباندىلىق تانىتامىز، - دەپ قوستى ول.

حامەنەي ءوز ۇندەۋىندە يزرايلدىڭ يران تەرريتورياسىنا جاساعان كەيىنگى سوققىلارىنا جاۋاپ قايتارعان ازاماتتاردىڭ ارەكەتىنە دە توقتالدى. ول يزرايل باسقىنشىلىعىنا قارسى ارەكەتتى «باتىل ءارى دەر كەزىندە جاسالدى» دەپ باعالاپ، مۇنىڭ يران قوعامىنىڭ جەتىلگەنى مەن رۋحاني كۇش-قۋاتىن ايعاقتايتىنىن باسا ايتتى.

- ءبىز يران حالقىنىڭ اگرەسسياعا قارسى قالاي سابىرلى ءارى بەرىك بولعانىن ماقتان تۇتامىز. بۇل تەرەڭ سانا مەن ۇلتتىق قادىر-قاسيەتتى كورسەتەدى، - دەدى ول.

حامەنەيدىڭ جولداۋى ايماقتاعى قاراما-قايشىلىقتاردىڭ كۇشەيۋى جانە ا ق ش-تا يراننىڭ جەر استىنداعى يادرولىق نىساندارىنا سوققى بەرۋگە قاتىسۋ مۇمكىندىگى تۋرالى تالقىلاۋلار تۇسىندا ايتىلدى.

ايتا كەتەيىك، ا ق ش پرەزيدەنتى سارسەنبى كۇنى يراننىڭ جوعارعى كوشباسشىسىن جويۋ مۇمكىندىگى تۋرالى مالىمدەگەن بولاتىن.

اۆتور

ەركەجان سماعۇلوۆا