يراندا بيىل 18 ايەل دارعا اسىلدى

سارسەنبى كۇنى يراندا كۇيەۋىن ولتىرگەنى ءۇشىن ءولىم جازاسىنا كەسىلىپ، ون جىلىن تۇرمەدە وتكىزگەن 29 جاستاعى ساميرا سابزيان دارعا اسىلدى.

ول - بيىل يران بيلىگى شەشىمىمەن ءولىم جازاسىنا كەسىلگەن 18- ايەل. جازا تەگەران سىرتىنداعى كارادجادا، «گەزەل حەسار» تۇرمەسىندە ورىندالدى، دەپ مالىمدەدى نورۆەگيادا ورنالاسقان يران قۇقىق قورعاۋ ۇيىمى (IHR) .

يراندىق باسىلىمدار بۇل تۋرالى جازبادى، بيلىك وكىلدەرى دە رەسمي راستاعان جوق.

ساميرا 15 جاسىندا تۇرمىسقا شىعىپ، بارعان جەرىندە زورلىق-زومبىلىققا ءجيى ۇشىرايتىن بولعان، دەيدى ونىڭ تۋىستارى.

19 جاسىندا ول كۇيەۋىن ءولتىردى دەگەن ايىپپەن ۇستالدى. سوت بىردەن ءولىم جازاسىن كەسكەنىمەن ءبىرقاتار بيۋروكراتيالىق سەبەپتەرگە بايلانىستى ونىڭ ورىندالۋى كەيىنگە شەگەرىلدى.

تۇتقىندالعان ساتتە ونىڭ ەكى بالاسى (بىرەۋى - ءسابي) بار ەدى. ولاردى كەيىنگى ون جىل ىشىندە كورۋگە ءبىر رەت قانا، دارعا اسپاس بۇرىن جەلتوقساندا رۇقسات بەردى.

Amnesty International قۇقىق قورعاۋ ۇيىمى مەن ءبىرقاتار ەل ۇكىمەتى، ونىڭ ىشىندە ۇلى بريتانيا جاس ايەلدى امان الىپ قالۋ ءۇشىن يران بيلىگىمەن كەلىسسوز جۇرگىزۋگە تىرىستى.

قۇقىق قورعاۋشىلاردىڭ پىكىرىنشە، كەيىنگى كەزدەرى يراندا ءولىم جازاسىنا كەسىلگەندەر سانى ايتارلىقتاي ارتقان. بيىل قاراشانىڭ وزىندە 115 ادام دارعا اسىلدى.

«ساميرا سابزيان - 2023 -جىلى دارعا اسىلعان 18- ايەل. بۇل - سۇمدىق ستاتيستيكا»، - دەيدى قۇقىق قورعاۋشىلار.

ادەتتە، ءولىم جازاسىنا كەسىلگەن ايەلدەر اتا- اناسىنىڭ قولداۋىنان دا ايىرىلادى. سەبەبى ولار «وتباسى ابىرويىن» قورعاۋدى ويلايدى.

اۆتور

بالنۇر قوجاگەلدى