يراندا ازياداعى ەڭ ۇلكەن تۇزدى كول قۇرعاپ كەتتى
استانا. KAZINFORM - يراندا ازياداعى «جاسى» 4000 جىلدان اسقان ەڭ ۇلكەن تۇزدى كول - ۋرميا تولىعىمەن قۇرعاپ قالدى، دەپ حابارلايدى Bild.
1980-جىلدارى كولدىڭ ۇزىندىعى 140 شاقىرىم، ال ەنى 55 شاقىرىم بولاتىن، ءبىراق 2025-جىلدىڭ جازىنا قاراي جەرسەرىكتەن تۇسىرىلگەن سۋرەتتەرگە قاراعاندا ودان بىرنەشە شالشىق قالعانى كورىنىپ تۇر.
iran News Update مالىمەتىنشە، ەلدە ميلليوننان استام زاڭسىز قۇدىق بار، ولار جىلدار بويى جەر استى سۋلارىن تاۋىسقان.
جاعدايدى اۋىل شارۋاشىلىعى ۋشىقتىرىپ تۇر: ول يراننىڭ سۋ رەسۋرستارىنىڭ %88 تۇتىنادى، ءبىراق جالپى ىشكى ءونىمنىڭ %10 عا جۋىعىن عانا بەرىپ وتىر. سالدارىنان ەل جىل سايىن تابيعي رەسۋرستار تولتىرا الاتىن سۋدان 43 ميلليون تەكشە مەترگە كوپ سۋدى تۇتىنىپ كەلەدى.
ۋرميانىڭ جويىلىپ كەتۋى جۇزدەگەن مىڭ ادامنىڭ ومىرىنە اسەر ەتتى: قازىر ايماق توپىراقتى بۇزىپ، اۋىل شارۋاشىلىعىن جۇرگىزۋدى مۇمكىن ەتپەيتىن تۇزدى داۋىلداردان زارداپ شەگىپ وتىر.
ەسكە سالايىق، شىلدەدە يران پرەزيدەنتى تەگەرانداعى سۋ ماسەلەسى كۇردەلى ەكەنىن مالىمدەدى.
پەزەشكيان سونداي-اق بۇل جاعدايدىڭ وتكەندەگى دۇرىس ەمەس شەشىمدەردەن تۋىنداعانىن اتاپ ءوتتى.
تامىز ايىندا پەزەشكيان يراندىق عالىمدار مەن ينتەلليگەنتسيانى سۋ داعدارىسىن شەشۋگە كومەكتەسۋگە شاقىردى.
