يراندا اكەسى قىزىن كوپشىلىكتىڭ كوزىنشە پىشاقتاپ، مەرت قىلدى

استانا. KAZINFORM - يراننىڭ يسلامشەحر قالاسىندا اكەسى 18 جاستاعى قىزى فاتەمە سولتانيدى سۇلۋلىق سالونىندا جۇمىس ىستەگەنى ءۇشىن پىشاقتاپ ءولتىردى، دەپ حابارلايدى IranWire.

فاتەمە ايەلدەرگە ارنالعان سۇلۋلىق سالونىندا جاسىرىن جۇمىس ىستەگەن، سەبەبى اكەسىنىڭ قاھارىنان قورىققان. قىزدىڭ سۇلۋلىق سالونىندا جۇمىس ىستەيتىنىن ەستىگەن اكەسى بىردەن سول جەرگە جەتىپ بارعان. قىز اكەسىن سىرتتان كورىپ، اناسىنا قوڭىراۋ شالىپ، نە ىستەۋ كەرەكتىگىن سۇراعان. الايدا ەر ادام سالونىڭ ىشىنە كىرىپ، قىزىنا بىرنەشە رەت پىشاق سۇققان.

كۋاگەرلەردىڭ ايتۋىنشا، ءول تىپتى قىزىنىڭ شاشىنان ۇستاپ، باسىن الۋعا ارەكەتتەنگەن. ءبىراق كوشەدەگىلەر ايقايلاي باستاعاندا، قاشىپ كەتكەن. كەيىن ايەلىنە حابارلاسىپ: «سەنى وسى قايعىمەن بىرگە قالدىردىم» دەگەن.

بەلگىلى بولعانداي، اكەسى ۇنەمى قىسىم كورسەتكەنى ءۇشىن فاتەمە اناسىمەن بىرگە بولەك تۇرعان.

HRANA اقپارات اگەنتتىگىنىڭ مالىمەتىنشە، قىلمىسكەر ۇستالىپ، وعان قاتىستى ءىس قوزعالعان.
يراندا فەميتسيد بويىنشا ناقتى ستاتيستيكا جاريالانبايدى، ءبىراق مۇنداي جاعدايلار جەرگىلىكتى باسىلىمداردا ءجيى جارىق كورەدى.

جەرگىلىكتى ب ا ق وكىلدەرى تاراتقان مالىمەتتەرگە سۇيەنسەك، وتكەن جىلى ناۋرىزدان قىركۇيەككە دەيىن تۋىستارى نەمەسە جاقىندارى قولىنان 78 ايەل قازا تاپقان.

2023 -جىلى Shargh گازەتى 2021-2023 -جىلدار ارالىعىندا ەر ادامدار كەم دەگەندە ءوز وتباسىنداعى 165 ايەلدى ولتىرگەنىن جازعان.  قىلمىسكەرلەر كوبىندە «نامىستى» نەگىزگى سەبەپ رەتىندە كورسەتكەن.

- بۇل ساندار تەك تىركەلگەن ىستەردى قامتيدى، ال ناقتى كورسەتكىش بۇدان الدەقايدا جوعارى بولۋى مۇمكىن، دەلىنگەن حاباردا.

ايتا كەتەيىك، ب ۇ ۇ 2024 -جىلى يران 901 ادامدى، ونىڭ ىشىندە جەلتوقسان ايىندا 40 قا جۋىق ادامدى ءبىر اپتانىڭ ىشىندە ءولىم جازاسىنا كەسكەنىن مالىمدەدى.

سونداي-اق، يران بيلىگى مۋزىكانت ايەل بولعانى ءۇشىن كونسەرتتى توقتاتقانىن جازدىق.

اۆتور

جاراسقان نۇرىبايەۆ