يراندا اۋە تاكسيى ىسكە قوسىلدى
استانا. قازاقپارات - IRNA حابارلاعانداي، يراندا ەل تاريحىنداعى العاشقى اۋە تاكسيى رەسمي تۇردە ىسكە قوسىلدى.
سالتاناتتى شاراعا پرەزيدەنت قاتىسىپ، بەينەۇندەۋ جولدادى.
العاشقى رەيس كەرەدج بەن كازۆين قالالارىن بايلانىستىرىپ، تۇراقتى جولاۋشىلار تاسىمالىنىڭ باستالعانىن ءبىلدىردى.
- اۋە تاكسيىنىڭ ىسكە قوسىلۋى - ۇلكەن بولاشاعى بار ماڭىزدى جەتىستىك، - دەدى يراننىڭ كولىك ءمينيسترىنىڭ كەڭەسشىسى جانە «پايام» ارنايى ەكونوميكالىق ايماعى مەن حالىقارالىق اۋەجايىنىڭ باس ديرەكتورى موحسەن حاسانلۋ.
ونىڭ ايتۋىنشا، بۇل جاڭا كولىك ءتۇرى پايام ارنايى ەكونوميكالىق ايماعىنا ينۆەستيتسيالار تارتۋعا، ۇلتتىق ەكونوميكانى جانداندىرۋعا جانە البورز پروۆينتسياسىنىڭ دامۋىنا سەرپىن بەرەدى. سونىمەن قاتار، حالىق ءۇشىن اۆياتسيا قىزمەتتەرىن كەڭىنەن پايدالانۋعا قولايلى جاعداي جاسايدى.
- اۋە تاكسيى از جۇكتەلەتىن اۋە باعىتتارىن جانداندىرۋدا ماڭىزدى ءرول اتقارادى، - دەپ اتاپ ءوتتى حاسانلۋ.
ول بۇل قىزمەتتى «يننوۆاتسيالىق شەشىم» دەپ باعالاپ، حالىقتىڭ اۋە تاسىمالىنا قول جەتكىزۋىنە جانە ينۆەستورلار ءۇشىن جاڭا مۇمكىندىكتەردىڭ اشىلۋىنا جول اشاتىنىن ايتتى.
مامانداردىڭ ايتۋىنشا، يراندا العاشقى اۋە تاكسيىنىڭ ىسكە قوسىلۋى - ەلدىڭ كولىك ينفراقۇرىلىمىن جاڭعىرتۋ مەن اۆياتسيا قىزمەتتەرىنىڭ قولجەتىمدىلىگىن كەڭەيتۋ جولىنداعى ەلەۋلى قادام.
