يرانعا قارسى «ءتۇن ورتاسىنداعى بالعا» وپەراتسياسى: پەنتاگون جان-جاقتى مالىمەت بەردى

استانا. KAZINFORM - پەنتاگون يراننىڭ 3 يادرولىق نىسانىن بومبالاۋ وپەراتسياسىنىڭ ەگجەي- تەگجەيىن مالىمدەدى، دەپ حابارلايدى kazinform اگەنتتىگىنىڭ مەنشىكتى ءتىلشىسى CBS News كە سىلتەمە جاساپ.

- بۇل بارىنشا قۇپيالاندىرىلعان ميسسيا بولدى جانە اتالعان جوسپاردىڭ مەرزىمى مەن سيپاتىن ۆاشينگتونداعى ساۋاناۋلى ادام عانا ءبىلدى، - دەدى جەكسەنبى كۇنى پەنتاگوندا وتكەن بريفينگتە گەنەرال دەن كەين.

كەيننىڭ ايتۋىنشا، «Operation Midnight Hammer» اتاۋىن العان ميسسيادا جەتى B-2 Spirit بومبالاۋشى ۇشاعى بولدى. ولار يرانعا اۋەدەن سوققى جاساۋ ءۇشىن ۋايتمەن اۋە بازاسىنان شىعىسقا قاراي، ميسسۋريگە ۇشىپ شىقتى. ال ۆ-2 ۇشاعىنىڭ كەلەسى توبى الداۋشى اسەر قالدىرۋ ءۇشىن تىنىق مۇحيتى ارقىلى باتىسقا، امەريكالىق گۋام اسكەري-تەڭىز بازاسىنا قاراي باعىت الدى.

ۇشاقتار شىعىسقا قاراي 18 ساعات ۇشتى. بومبالاۋشى ۇشاقتار اتلانت مۇحيتى مەن جەرورتا تەڭىزىن كەسىپ ءوتۋى ءۇشىن اۋەدە بىرنەشە مارتە جانارماي قۇيىپ الۋلارىنا تۋرا كەلدى.

ۇشاقتار يران اۋە كەڭىستىگىنە كىرەردىڭ الدىندا امەريكالىق سۇڭگۋىرلەر يسفاحانداعى نىساندارعا «توماگاۆك» دەپ اتالاتىن جيىرمادان استام قاناتتى زىمىرانمەن سوققى جاسادى. بومبالاۋشى ۇشاقتار دىتتەگەن نىسانعا جاقىنداعان ساتتە جويعىش ۇشاقتار ولاردىڭ الدىنداعى اۋە كەڭىستىگىن تازالاپ، جاۋ ۇشاقتارى مەن «جەر- اۋە» ساناتىنداعى زىمىرانداردىڭ بولماۋىن تەكسەرىپ وتىردى.

25 مينۋتتىڭ ىشىندە فوردو مەن ناتانزداعى نىسانالارعا GBU-57 Massive Ordnance Penetrators (مور) دەگەن اتاۋمەن تانىمال جالپى 14 «بۋنكەرلىك» بومبا تاستالدى.

كەيننىڭ اتاپ وتۋىنشە، امەريكالىق ۇشاقتار يران اۋە كەڭىستىگىنەن شىعىپ بارا بارا جاتقان كەزدە ولارعا بىردە-ءبىر وق اتىلعان جوق.

- يراننىڭ جويعىش ۇشاقتارى اۋەگە كوتەرىلگەن جوق. جالپى، يراندىق «جەر- اۋە» زىمىران جۇيەسى ءبىزدى بايقاماي قالعان سياقتى. بۇكىل ميسسيا بارىسىندا توسىننان سوققى جاساۋ الەۋمەتى ساقتالدى، - دەدى دەن كەين.

اۋە وپەراتسياسىنا ۆ-2 بومبالاۋشى ۇشاقتارىن، جويعىش ۇشاقتاردى، جانارماي تاسىمالدايتىن ۇشاقتار مەن بارلاۋشى ۇشاقتاردى قوسا العاندا 125 تەن استام اۋە كەمەسى قاتىستى. شابۋىل بارىسىندا 75 تەن استام جوعارى دالدىكتى قارۋ قولدانىلدى.

شابۋىل بارىسىندا كەلگەن شىعىندى الدىن الا باعالاۋعا قاراعاندا، ءۇش نىساننىڭ بارلىعى دا وتە قاتتى بۇلىنگەن.

پەنتاگون وكىلى يراندى قانداي دا ءبىر قارىمتا شابۋىل جاساۋدان اۋلاق بولۋعا شاقىردى.

- ءبىزدىڭ كۇشتىك قۇرىلىمدارىمىز جوعارى دايىندىق دەڭگەيىندە قالا بەرەدى جانە يراننىڭ كەز كەلگەن قارىمتا ءىس-قيمىلىنا نەمەسە پروكسي- شابۋىلدارىنا قارسى ارەكەت ەتۋگە تولىعىمەن دايىن. ولاردىڭ مۇنداي قادامعا بارۋى بارىنشا ءساتسىز تاڭداۋ بولار ەدى. ءبىز قورعانامىز، - دەپ مالىمدەدى دەن كەين.

ايتا كەتەرلىگى، اق ءۇي باسشىسى دونالد ترامپ قۇراما شتاتتاردىڭ قارۋلى كۇشتەرى يران رەجيمىنىڭ ءۇش ماڭىزدى يادرولىق نىسانىنا - فوردو، ناتانز جانە يسفاحانعا دالدىكپەن، اۋقىمدى سوققىلار جاساعاننان كەيىن حالقىنا ۇندەۋ جاساعان ەدى.

- ءبىزدىڭ ماقساتىمىز - يراننىڭ ۋران بايىتۋ ينفراقۇرىلىمىن جويۋ جانە بۇكىل الەمگە يادرولىق قاۋىپ ءتوندىرىپ وتىرعان، تەرروريزمنىڭ باستى دەمەۋشىسى سانالاتىن مەملەكەتتەن بۇل قاۋىپتىڭ كوزىن قۇرتۋ. بۇگىن بۇكىل الەمگە ايتا الامىن: بۇل سوققىلار - ايرىقشا اسكەري جەتىستىك... بىزگە بۇل اسكەردىڭ قىزمەتى بۇدان بىلاي قاجەت بولمايدى دەپ ۇمىتتەنەمىن. نەمەسە بەيبىتشىلىك ورنايدى، نەمەسە يران سوڭعى سەگىز كۇندە كورگەنىنەن دە قورقىنىشتى تراگەديامەن بەتپە-بەت كەلەدى، - دەدى دونالد ترامپ.

قورعانىس ءمينيسترى پيت حەگسەت بۇل شابۋىلدى «اقىلعا سىيمايتىن ءارى تاڭ قالارلىق» دەپ سيپاتتادى.

- پرەزيدەنت ترامپ جوسپارلاعان وپەراتسيا باتىل ءارى تاماشا بولدى جانە الەمگە امەريكالىق تەجەۋدىڭ ورالعانىن كورسەتتى. پرەزيدەنت ايتقان كەزدە الەم وعان قۇلاق اسۋى ءتيىس، - دەپ مالىمدەدى پيت حەگسەت.

مەملەكەتتىك حاتشى ماركو رۋبيو «Face the Nation with Margaret Brennan» باعدارلاماسىندا سويلەگەن سوزىندە يراندى ديپلوماتيانى جالعاستىرۋعا شاقىرىپ، ا ق ش- تىڭ يرانعا قارسى بۇدان ءارى شابۋىل جاساۋ جوسپارى جوق ەكەنىن حابارلادى.

رۋبيونىڭ مالىمدەۋىنشە، ا ق ش ميسسياسى «يرانعا، يران حالقىنا شابۋىل جاساۋ ەمەس. بۇل رەجيمدى وزگەرتۋگە باعىتتالعان قادام بولعان جوق. بۇل قادام يادرولىق قارۋ جاساۋ امبيتسيالارىمەن بايلانىستى ءۇش يادرولىق نىساندى جويۋعا باعىتتالدى جانە ول كەشە ورىندالدى».

- ەندى نە بولاتىنى يراننىڭ ءارى قارايعى شەشىمىنە بايلانىستى بولادى. ولار ديپلوماتيا جولىن تاڭداسا، ءبىز دايىنبىز. ءبىز ولار ءۇشىن دە، يران حالقى ءۇشىن دە، الەم ءۇشىن دە ءتيىمدى مامىلە جاساي الامىز. ەگەر ولار باسقا جولدى تاڭداسا، ونىڭ سالدارى بولادى، - دەدى ماركو رۋبيو.

ال تۇركيا پرەزيدەنتى اكىمشىلىگىنىڭ كوممۋنيكاتسيالار باسقارماسىنىڭ ديرەكتورى فاحرەتتين التۋن يراننىڭ يادرولىق نىساندارىنا جاسالعان ا ق ش- تىڭ اۋە سوققىلارى مەن يزرايلدىڭ يرانعا قارسى اگرەسسياسىنا ۆاشينگتوننىڭ قوسىلۋىن قاتاڭ سىنعا الدى.

ول بۇل ارەكەتتەر تاياۋ شىعىستا بەيبىتشىلىك پەن تۇراقتىلىققا ەمەس، كەرىسىنشە، جاڭا دەڭگەيدەگى حاوس پەن بەيبەرەكەتسىزدىككە اپاراتىنىن مالىمدەدى.

- ا ق ش- تىڭ يرانداعى يادرولىق نىساندارعا جاساعان اۋە سوققىسى جانە يزرايلدىڭ يرانعا قارسى اگرەسسياسىنا قوسىلۋى - بۇل بەيبىتشىلىك پەن تۇراقتىلىققا ەمەس، حاوس پەن تارتىپسىزدىككە اپاراتىن جاڭا قادام، - دەدى التۋن.

بۇگىن ا ق ش- تىڭ يرانداعى يادرولىق نىساندارعا جاساعان شابۋىلىنا بايلانىستى يراننىڭ ب ۇ ۇ جانىنداعى ەلشىسى ءارى تۇراقتى وكىلى امير سايد يراۆاني جەكسەنبى كۇنى ب ۇ ۇ باس حاتشىسى مەن قاۋىپسىزدىك كەڭەسىنىڭ ءتوراعاسىنا رەسمي حات جولداعانى بەلگىلى بولدى.

- يران يسلام رەسپۋبليكاسى ەشقانداي ارانداتۋشىلىق سەبەپسىز جاسالعان بۇل الدىن الا جوسپارلانعان اگرەسسيۆتى ارەكەتتەردى قاتاڭ تۇردە ايىپتايدى. بۇل شابۋىلدار - 13-ماۋسىمدا يزرايل رەجيمى يراننىڭ بەيبىت يادرولىق نىساندارىنا جاساعان اۋقىمدى اسكەري وپەراتسياسىنىڭ جالعاسى، - دەلىنگەن حات ماتىنىندە.