يران يزرايلدىڭ اسپانىن تولىق باقىلاۋعا العانىن مالىمدەدى
استانا. KAZINFORM - يراننىڭ يسلام ريەۆوليۋتسياسى ساقشىلارى كورپۋسى (IRGC نەمەسە ك س ي ر) تەل- اۆيۆتىڭ كەيبىر بولىكتەرىندەگى تۇرعىنداردى ەۆاكۋاتسيالاۋعا شاقىرىپ، ەسكەرتۋ جاريالادى. بۇل تۋرالى Kazinform اگەنتتىگى BBC گە سىلتەمە جاساپ حابارلادى.
وعان دەيىن ۇقساس ەسكەرتۋ يران تۇرعىندارىنا دا جاسالعان بولاتىن - بۇل جولى يزرايل ارمياسى الەۋمەتتىك جەلىلەر ارقىلى تەگەراننىڭ ءبىر اۋدانىنداعى اسكەري نىساندارعا سوققى جاسالاتىنىن حابارلاعان.
ك س ي ر سونىمەن قاتار يزرايلدىڭ اۋە كەڭىستىگىن تولىق باقىلاۋعا العانىن مالىمدەدى.
يراننىڭ بۇل مالىمدەمەسىنە سەبەپ - يزرايلگە جاسالعان سوڭعى زىمىران سوققىسى. كسير وكىلدەرىنىڭ ايتۋىنشا، بۇل شابۋىل ولاردىڭ يزرايل اسپانىن باقىلاۋعا العانىن دالەلدەيدى.
يزرايل قورعانىس ارمياسى تۇنگى ۋاقىتتا يران تاراپىنان شامامەن 25 زىمىران ەكى كەزەڭدە ءبىر ساعات ىشىندە اتىلعانىن حابارلادى. بۇل شابۋىلدىڭ ناقتى سالدارى تۋرالى اقپارات جاريالانعان جوق. يزرايلدىك مەديتسينالىق قىزمەت وكىلدەرى جاراقات العاندار بويىنشا شاقىرتۋلار تۇسپەگەنىن مالىمدەگەن.
ايتا كەتەيىك، يران يزرايلگە تاعى بىرنەشە زىمىران جىبەردى.
ۇلىبريتانيانىڭ سىرتقى بارلاۋ قىزمەتى - MI6 تىڭ بۇرىنعى باسشىسى دجون سويەرس BBC گە بەرگەن سۇحباتىندا يزرايل يرانداعى كەيبىر اسا ماڭىزدى يادرولىق نىساندارعا شابۋىل جاساماعانىن، ويتكەنى ولار تەرەڭ جەراستى بەكىنىستەرىندە ورنالاسقانىن ايتتى.
ەۋروپالىق ديپلوماتيا باسشىسى كايا كاللاس ا ق ش-تىڭ ارالاسۋى تاياۋ شىعىستاعى قاقتىعىستىڭ ورشۋىنە اكەلەتىنىن ايتتى.
