يران يزرايلگە زىمىران اتتى: ەلدە اۋە دابىلى جاريالاندى

استانا. KAZINFORM - يزرايلدە اۋە دابىلى جاريالاندى، ارميا يران تاراپىنان زىمىرانداردىڭ ۇشىرىلعانىن تىركەگەنىن حابارلادى، دەپ جازادى BBC.

يزرايل قارۋلى كۇشتەرى (ساحال) يران اۋماعىنان زىمىران ۇشىرىلعانىن جانە ولاردىڭ يزرايلگە قاراي باعىت العانىن مالىمدەدى. بارلىق تۇرعىنعا باسپاناعا جاسىرىنۋعا جانە «ەرەكشە بۇيرىق بەرىلگەنگە دەيىن سول جەردە قالۋعا» كەڭەس بەرىلدى، دەپ حابارلايدى AFP.

AFP اگەنتتىگىنىڭ مالىمەتىنشە، يەرۋساليمدە اۋە دابىلىنىڭ سيرەنالارى قوسىلدى.

زىمىرانداردىڭ يزرايلگە قاراي ۇشىرىلعانىن يراننىڭ مەملەكەتتىك تەلەارناسى دا راستادى. سونىمەن قاتار، يراننىڭ IRNA اگەنتتىگى يزرايلگە قارسى زىمىران شابۋىلىنىڭ ەكىنشى تولقىنى باستالعانىن حابارلادى.

ەسكە سالايىق، جۇماعا قاراعان ءتۇنى يزرايل يران اۋماعىنا جاپپاي سوققى جاسادى. بۇل شابۋىلدىڭ سالدارىنان يسلام ريەۆوليۋتسياسى ساقشىلار كورپۋسىنىڭ (ك س ي ر) ءبىرقاتار جوعارى لاۋازىمدى كومانديرلەرى مەن يادرولىق فيزيكا سالاسىنداعى عالىمدار قازا تاپتى. يران سونداي-اق ناتانز قالاسىنداعى يادرولىق نىساننىڭ زاقىمدانعانىن راستادى، ءبىراق رادياتسيانىڭ تارالۋ فاكتىسىن جوققا شىعاردى.

ا ق ش مەملەكەتتىك حاتشىسى ءيزرايلدىڭ يرانعا قارسى جاساعان سوققىلارىن «ءبىرجاقتى ارەكەت» دەپ اتاپ، وعان اق ءۇيدىڭ قاتىسى جوق ەكەنىن مالىمدەدى.

يزرايلدىڭ يرانعا جاساعان سوققىسىنان كەيىن مۇناي باعاسى كۇرت كوتەرىلدى.