يران يزرايلگە ونداعان زىمىران اتتى
استانا. KAZINFORM - جەكسەنبى كۇنى تاڭەرتەڭ يراننىڭ يسلام ريەۆوليۋتسياسى ساقشىلار كورپۋسى (كسير) يزرايلگە قاراي وتىزعا جۋىق زىمىرانمەن سوققى جاسادى، دەپ جازدى DW.
ا ق ش اسكەري-اۋە كۇشتەرى يراننىڭ يادرولىق نىساندارىنا سوققى بەرگەننەن كەيىن بىرنەشە ساعاتتان كەيىن قارىمتا شابۋىل جاسالدى.
يراننىڭ مەملەكەتتىك تەلەارناسىنىڭ مالىمەتىنشە، شابۋىل ءۇشىن شامامەن 30 زىمىران قولدانىلعان.
Reuters كۋاگەرلەرگە سىلتەمە جاساپ، يزرايلدىڭ ورتالىق بولىگىندە بىرنەشە جارىلىستىڭ بولعانىن حابارلادى.
AFP اگەنتتىگى يەرۋساليمدە دە جارىلىستار تىركەلگەنىن جازادى.
يزرايلدىڭ Kan تەلەراديوكورپوراتسياسى كەم دەگەندە ون زىمىران سوققىسى جاسالعانىن راستادى.
بۇعان دەيىن يران جاعى ا ق ش- تىڭ يادرولىق نىساندارعا جاساعان شابۋىلىن باتىس پەن يزرايل تاراپىنان بولعان اشىق ارانداتۋشىلىق دەپ باعالاپ، جاۋاپ قايتارۋعا ۋادە ەتكەن ەدى.
كسير مالىمدەمەسىندە بۇل شابۋىل يران مەن يزرايل اراسىنداعى شيەلەنىستى تولىققاندى سوعىسقا اينالدىرعانىن ايتقان.
كەيىنىرەك قازاقستان رەسپۋبليكاسىنىڭ سىرتقى ىستەر مينيسترلىگى دە تاياۋ شىعىستاعى جاعدايعا قاتىستى مالىمدەمە جاساپ، يادرولىق قارۋدىڭ تارالۋىنا جول بەرمەيتىن كەلىسىم جاساۋ قاجەتتىگىن اتاپ ءوتتى.
ەسكە سالا كەتەيىك، ا ق ش يراننىڭ يادرولىق نىساندارىنا سوققى جاساپ، ترامپ وپەراتسيانى ءساتتى دەپ اتادى.
ارتىنشا دونالد ترامپ يراننىڭ ۋران بايىتۋ نىساندارىن تولىقتاي جويعانىن مالىمدەدى.
يران ا ق ش شابۋىل جاساعان ءۇش يادرولىق نىساندى الدىن الا ەۆاكۋاتسيالاعان. بۇل تۋرالى BBC- ءدىڭ پارسى قىزمەتى يران راديوسى حابارلادى. اقپاراتقا سەنسەك، تەگەران ا ق ش-تان شابۋىل بولاتىنىن كۇتتى. وسىعان بايلانىستى يادرولىق ورتالىقتاردان بايىتىلعان ۋران قورلارى الدىن الا شىعارىلعان. رادياتسيانىڭ تارالۋ قاۋپى جوق. وسىعان قاراماستان، يراننىڭ اتوم ەنەرگياسى جونىندەگى اگەنتتىگى يادرولىق ونەركاسىپتى دامىتۋدى توقتاتپايتىنىن مالىمدەدى.
ايتا كەتكەن ءجون، كەشە يران يادرولىق باعدارلاماسى بويىنشا ا ق ش- پەن كەلىسسوز جۇرگىزۋگە دايىن ەكەنىن مالىمدەگەن ەدى. يسلام رەسپۋبليكاسىنىڭ سىرتقى ىستەر ءمينيسترى ابباس اراكچي ىستانبۇلداعى يسلام ىنتىماقتاستىعى ۇيىمىنىڭ جيىنىندا ديپلوماتيالىق ديالوگقا ورالۋ ءۇشىن يزرايل باسقىنشىلىق ارەكەتىن توقتاتۋعا ءتيىس دەپ ايتتى. الايدا ا ق ش پەن يزرايل بۇعان جاۋاپ قايتارعان جوق.
