يران پورتىنداعى جارىلىستان قازا تاپقاندار سانى ارتتى

استانا. KAZINFORM - يراننىڭ وڭتۇستىگىندە، پارسى شىعاناعى جاعالاۋىنداعى بەندەر-ابباس پورتىنداعى جويقىن جارىلىستان قازا تاپقاندار سانى 14 كە جەتتى، دەپ حابارلادى انادولى.

يران مەملەكەتتىك تەليەۆيدەنيەسىنىڭ مالىمەتىنشە، يران ىشكى ىستەر ءمينيسترى يسكەندەر مۋمەني قۇرباندار سانى ارتۋى مۇمكىن ەكەنىن ايتتى. مۋمەني زارداپ شەككەن 200 ادام اۋرۋحانالاردان شىعارىلعانىن، جالپى شىعارىلعاندار سانى 412 ادامعا جەتكەنىن اتاپ ءوتتى. قازىر اۋرۋحانالاردا شامامەن 300 ادام ەم الىپ جاتىر.

يران ىشكى ىستەر ءمينيسترى ءورت باقىلاۋعا الىنعانىن، ءبىراق ونى تولىق ءسوندىرۋ جۇمىستارى ءالى جالعاسىپ جاتقانىن حابارلادى.

ەسكە سالساق، كۇندىز بەندەر-ابباس پورتىندا جويقىن جارىلىس بولدى. ونىڭ سەبەبى ازىرگە بەلگىسىز. باستاپقىدا 47 ادام جارالانعانى جانە 8 ادام قازا تاپقانى حابارلانعان، ءبىراق كەيىن زارداپ شەككەندەر سانى 750 گە جەتتى. وقيعا ورنىنان تۇسىرىلگەن كادرلاردان پورتتىڭ ءبىر بولىگىنىڭ قاتتى زاقىمدانعانىن كورۋگە بولادى.

قايعىلى وقيعاعا بايلانىستى مەملەكەت باسشىسى يران پرەزيدەنتىنە كوڭىل ايتۋ جەدەلحاتىن جولدادى.