يران ۋراندى بەيبىت ماقساتتا بايىتۋدى جالعاستىرۋى قاجەت - ابباس اراگچي

استانا. KAZINFORM - يران راديوفارماتسيەۆتيكالىق پرەپاراتتار مەن جاڭا يادرولىق ەنەرگەتيكالىق رەاكتورلارعا ارنالعان وتىن ءوندىرۋ ءۇشىن ۋراندى بەيبىت ماقساتتا بايىتۋدى جالعاستىرۋى ءتيىس، دەپ جازادى سينحۋا.

بۇل تۋرالى دۇيسەنبى كۇنى ەلدىڭ سىرتقى ىستەر ءمينيسترى ابباس اراگچي مالىمدەدى.

- اقىل-پاراساتى بار ەشبىر ادام ءومىردى ساقتاپ قالۋعا مۇمكىندىك بەرەتىن بەيبىت ماقساتتاعى وتاندىق تەحنولوگيالارعا سالىنعان وراسان ينۆەستيتسيانىڭ جەمىسىنەن، تەك شەتەلدىك قورقىتىپ-ۇركىتۋلەر ءۇشىن باس تارتپايدى، - دەپ جازدى اراگچي X الەۋمەتتىك جەلىسىندەگى پاراقشاسىندا.

سوڭعى اپتالاردا يران يادرولىق ماسەلەگە قاتىستى ديپلوماتيالىق كۇش- جىگەرىن جانداندىردى. جۇما كۇنى تاڭەرتەڭ يران، فرانسيا، ۇلى بريتانيا جانە گەرمانيا (ياعني، «ەۋروپالىق ۇشتىك») تۇركيانىڭ ىستانبۇل قالاسىندا يادرولىق كەلىسسوزدەردى قايتا جالعاستىردى.

دۇيسەنبى كۇنى يران سىرتقى ىستەر مينيسترلىگىنىڭ رەسمي وكىلى ەسمايل باگاي الداعى ەكى اپتادا ەلگە حالىقارالىق اتوم ەنەرگياسى اگەنتتىگىنىڭ (ماگاتە) توبى كەلەتىنىن جانە يران مەن ماگاتە اراسىنداعى بولاشاق ىنتىماقتاستىققا قاتىستى جوسپاردىڭ ۇسىنىلاتىنىن حابارلادى.

بۇدان بۇرىن ا ق ش پرەزيدەنتى دونالد ترامپ يراننىڭ يادرولىق نىساندارى قايتا ىسكە قوسىلاتىن بولسا، ولاردى «ساۋساعىن كوتەرىپ ۇلگەرگەنشە جويىپ جىبەرەمىن» دەپ مالىمدەدى.