يران مەن يزرايل اراسىنداعى شيەلەنىس كۇشەيە ءتۇستى
استانا. KAZINFORM - يران بەەر-شيەۆا قالاسىنا تاعى دا راكەتالىق سوققى جاسادى، ال يزرايل بۇل ارەكەتكە جاۋاپ رەتىندە تەگەرانداعى نىساندارعا اۋقىمدى شابۋىل ۇيىمداستىردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
يران مەن يزرايل اراسىنداعى شيەلەنىس سەگىزىنشى كۇنى جالعاسىپ جاتىر. يران بەەر-شيەۆاعا تاعى دا زىمىرانمەن سوققى جاسادى، ال يزرايل تەگەرانداعى اسكەري جانە يادرولىق نىساندارعا اۋقىمدى اۋە شابۋىلىمەن جاۋاپ بەردى.
يزرايلدىڭ وڭتۇستىگىنە جاسالعان زىمىران سوققىسى
جۇما كۇنى تاڭەرتەڭ يران يزرايل اۋماعىنا بىرنەشە بالليستيكالىق زىمىران جىبەردى. يزرايل ارمياسىنىڭ مالىمەتىنشە، زىمىرانداردىڭ ءبىرى ەلدىڭ وڭتۇستىگىندەگى بەەر-شيەۆا قالاسىنا تىكەلەي ءتيدى. سوققى تۇرعىن ۇيلەر ورنالاسقان اۋدان مەن جاقىن ماڭداعى تەحنوپارككە تۇسكەن. يزرايلدىڭ شۇعىل كومەك قىزمەتى Magen David Adom بەس ادامنىڭ جەڭىل جاراقات العانىن، سونداي-اق 30 دان استام ادام ۇرەي مەن كۇيزەلىستەن زارداپ شەككەنىن حابارلادى.
- قالىڭ ءتۇتىن، ورتەنىپ جاتقان كولىكتەر مەن قيراعان عيماراتتاردى كوردىم. جارالانعاندارعا سول جەردە العاشقى كومەك كورسەتىلىپ جاتىر، ءبىز ەكى مەديتسينالىق كومەك كورسەتۋ پۋنكتىن ۇيىمداستىردىق، - دەدى فەلدشەر دۆير بەن-زەەۆ.
قالالىق اكىمدىكتىڭ مالىمەتىنشە، بەەر-شيەۆانىڭ تەمىرجول ستانسياسى مەن Gav-Yam Negev تەحنوپاركىندەگى كەڭسەلەر، سونىڭ ىشىندە Microsoft عيماراتى زاقىمدانعان.
Al Jazeera مالىمەتىنە سايكەس، بۇل تەحنوپارك بەن-گۋريون اتىنداعى ۋنيۆەرسيتەتتىڭ جانىندا ورنالاسقان جانە يزرايل ارمياسىنىڭ تەلەكوممۋنيكاتسيالىق بولىمشەسى - C4i كامپۋسىنا جاقىن جەردە ورنالاسقان. سوققىلار ناتيجەسىندە ورتالىق تەمىرجول ۆوكزالىنىڭ جۇمىسى توقتاعانى دا حابارلاندى.
يزرايلدىڭ يرانعا جاساعان اۋە سوققىلارى
جۇماعا قاراعان ءتۇنى يزرايل اسكەري-اۋە كۇشتەرى يران اۋماعىنداعى ونداعان نىسانعا سوققى بەردى. يزرايل ارمياسى (ساحال) تاراتقان مالىمەتكە سايكەس، وپەراتسياعا 60-تان استام جويعىش ۇشاق قاتىسىپ، 120-عا جۋىق وق-ءدارى قولدانىلعان. سوققىلار تەگەران ماڭىنداعى نىساندارعا باعىتتالعان.
- نىسانداردىڭ قاتارىندا زىمىران قوزعالتقىشتارىن قۇيۋعا ارنالعان ماتەريالدار مەن زىمىران كومپونەنتتەرىن وندىرەتىن وبەكتىلەر بولدى، - دەلىنگەن يزرايل ارمياسىنىڭ مالىمدەمەسىندە. - سونداي-اق يادرولىق سالاداعى يراننىڭ اسكەري زەرتتەۋ باعدارلاماسىمەن تىكەلەي بايلانىستى س پ ن د جوباسىنا قاتىستى نىسانعا سوققى جاسالدى، - دەپ ناقتىلادى يزرايل قورعانىس كۇشتەرى.
يزرايل تۇنگى شابۋىل كەزىندە جويىلعان نىسانداردىڭ ءبىرى يادرولىق قارۋ ازىرلەۋدە قولدانىلاتىن ماڭىزدى كومپونەنتتەردى وندىرەتىن زاۋىت بولعانىن مالىمدەدى.
شيەلەنىس جالعاسىپ جاتىر
بەەر-شيەۆاعا جاسالعان سوققىدان بولەك، يزرايلدىڭ اۋە قورعانىس جۇيەلەرى ءولى تەڭىز ماڭىندا بىرنەشە ۇشقىشسىز ۇشۋ اپپاراتىن (دروندى) اتىپ ءتۇسىردى. ال يراندا اۋە شابۋىلىنا قارسى قورعانىس كەشەندەرى يسفاحان قالاسىندا جانە ەلدىڭ سولتۇستىگىندەگى رەشت اۋدانى ماڭىندا ىسكە قوسىلدى.
يسلام ريەۆوليۋتسياسى ساقشىلارى كورپۋسى تەگەراننىڭ وڭتۇستىگىندەگى كاحريزاك اۋدانىندا يزرايلگە تيەسىلى ۇشقىشسىز ۇشۋ اپپاراتىن (دروندى) اتىپ تۇسىرگەنىن مالىمدەدى.
يزرايل ارمياسى بەەر-شيەۆەدەگى نىسانعا زىمىراننىڭ جەتىپ، توسقاۋىلسىز سوعىلۋىنا سەبەپ بولعان تەحنيكالىق اقاۋعا قاتىستى ازىرگە رەسمي پىكىر بىلدىرگەن جوق. الايدا، بۇقارالىق اقپارات قۇرالدارىنىڭ حابارلاۋىنشا، اۋە قورعانىس جۇيەسىنىڭ ءىشىنارا جۇكتەمەگە بايلانىستى شامادان تىس جۇمىس ىستەۋى (پەرەگرۋزكا) ىقتيمال سەبەپ رەتىندە قاراستىرىلىپ جاتىر.
ايتا كەتەلىك يراندا يسلام ريەۆوليۋتسياسى قامقورشىلار كورپۋسى بارلاۋ قىزمەتىنىڭ جاڭا باسشىسىن تاعايىندادى.
اۆتور
نازىم بولەسوۆا
