يران مەن ا ق ش ومان ەلىندە يادرولىق كەلىسسوزدەردى قايتا باستادى
استانا. KAZINFORM - تەگەران سانكسيالاردىڭ جەڭىلدەتىلۋىن جانە بەيبىت يادرولىق ەنەرگيانى پايدالانۋ قۇقىعىن الۋعا ۇمتىلىپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
يران مەن ا ق ش- تىڭ باستى كەلىسسوز جۇرگىزۋشىلەرى تەگەراننىڭ يادرولىق باعدارلاماسىنا قاتىستى كەلىسپەۋشىلىكتەردى تالقىلاۋدى قايتا باستادى، دەپ حابارلايدى يراننىڭ IRNA اگەنتتىگى. كەزدەسۋ اقش پرەزيدەنتى دونالد ترامپتىڭ تاياۋ شىعىسقا ساپارى قارساڭىندا ۆاشينگتون ۇستانىمىنىڭ قاتاڭداۋى اياسىندا ءوتىپ جاتىر.
ەكى تاراپ تا ديپلوماتيالىق جولدى قولدايتىنىن مالىمدەگەنىمەن، تەگەران مەن ۆاشينگتون اراسىندا جاڭا يادرولىق كەلىسىمگە قول جەتكىزۋ جانە اسكەري قاقتىعىستىڭ الدىن الۋ ءۇشىن شەشىلۋى ءتيىس ماڭىزدى ماسەلەلەر بويىنشا تەرەڭ قاراما-قايشىلىقتار ساقتالىپ وتىر.
يراننىڭ سىرتقى ىستەر ءمينيسترى ابباس اراكچي مەن ترامپتىڭ تاياۋ شىعىس جونىندەگى ارنايى وكىلى ستيۆ ۋيتكوفف ماسكات قالاسىندا، وماننىڭ اراعايىندىعىمەن، كەلىسسوزدەردىڭ ءتورتىنشى كەزەڭىن وتكىزىپ جاتىر. بۇل كەلىسسوزدەر اقش تاراپىنان ايتىلعان قاتاڭ مالىمدەمەلەرگە قاراماستان ءوتىپ وتىر. تەگەران مۇنداي ريتوريكانى پروگرەسكە كەدەرگى رەتىندە قابىلدايدى.
يران سانكسيالاردىڭ جەڭىلدەتىلۋىنە جانە بەيبىت يادرولىق ەنەرگيانى دامىتۋ قۇقىعىنىڭ مويىندالۋىنا ۇمتىلاتىنىن مالىمدەدى.
- دەلەگاتسيا يران حالقىنىڭ مۇددەلەرىن قورعاۋعا جانە بەيبىت اتوم سالاسىنداعى جەتىستىكتەرىمىزدى ساقتاي وتىرىپ، سانكتسيالاردىڭ جويىلۋىنا قول جەتكىزۋگە بار كۇشىن سالادى، - دەدى يران سىرتقى ىستەر مينيسترلىگىنىڭ وكىلى يسمايل باكاي.
كەزدەسۋ الدىندا اراكچي يراننىڭ ۋران بايىتۋ قۇقىعى «تالقىلاۋعا جاتپايتىنىن» اتاپ ءوتتى.
- يراننىڭ ناقتى ۇستانىمى بار، ول ايقىن قاعيدالارعا نەگىزدەلگەن… ءبىز جەكسەنبى كۇنى وتەتىن كەزدەسۋدە بەلگىلى ءبىر كەلىسىمگە كەلەمىز دەپ ۇمىتتەنەمىز، - دەدى ول يران تەلەديدارىنا بەرگەن سۇحباتىندا.
سونداي-اق ول كەلىسسوزدەر شەشۋشى كەزەڭگە جەتەدى دەپ ءۇمىت ءبىلدىردى:
- بۇگىن تاڭەرتەڭ تەگەراندا قوسىمشا كەڭەستەر وتكىزدىك، جانە وسى راۋندتا ماڭىزدى ناتيجەگە قول جەتكىزەمىز دەپ سەنەمىز.
ومان اراعايىندىعىمەن ءوتىپ جاتقان كەلىسسوزدەر ءبىر اي بۇرىن باستالعان الدىڭعى راۋندتاردىڭ جالعاسى بولىپ تابىلادى. تاراپتار بىرتىندەپ ىلگەرىلەۋشىلىك بار ەكەنىن حابارلاعانىمەن، ۋران بايىتۋ قۇقىعىنا قاتىستى باستى قايشىلىقتار ساقتالىپ وتىر. تەگەران بۇل قۇقىقتى تالقىلاۋعا كەلمەيتىن ماسەلە دەپ ساناسا، ۆاشينگتون ونى «قىزىل سىزىق» دەپ اتاۋدا.
بۇعان دەيىن ماسكات پەن ريم قالالارىندا ءۇش كەلىسسوز راۋندى وتكەن: العاشقىسى – 12-ساۋىردە ماسكاتتا، ەكىنشىسى – 19-ساۋىردە ريمدە، ءۇشىنشىسى – 26-ساۋىردە قايتادان ماسكاتتا.
3-مامىرعا جوسپارلانعان كەلەسى كەزدەسۋ «لوگيستيكالىق سەبەپتەرگە» بايلانىستى كەيىنگە شەگەرىلدى، دەپ 1-مامىردا حابارلادى ومان سىرتقى ىستەر ءمينيسترى بادر ءال-بۋسايدي.
ايتا كەتەلىك يران مەن اقش اراسىنداعى ديالوگتىڭ كەلەسى راۋندى وماندا 11 مامىردا وتەتىنى تۋرالى جازعان ەدىك.
