يران مەن ا ق ش اراسىنداعى كونسۋلتاتسيالار ومانداعى ءۇشىنشى راۋند كۇنىنە اۋىستىرىلدى
استانا. KAZINFORM - يران مەن ا ق ش اراسىنداعى تەحنيكالىق كەزدەسۋدى كەيىنگە قالدىرۋ تۋرالى شەشىم ماسكاتتىڭ باستاماسىمەن جانە ەكى تاراپتىڭ كەلىسىمىمەن قابىلداندى، دەپ حابارلايدى Kazinform ءتىلشىسى.
سارسەنبى كۇنگە جوسپارلانعان يراندىق-امەريكا ساراپشىلارى دەڭگەيىندەگى كەلىسسوزدەر سەنبى، 26-ساۋىرگە اۋىستىرىلادى. بۇل تۋرالى سەيسەنبى كۇنى تەگەران سىرتقى ىستەر مينيسترلىگىنىڭ وكىلى حابارلادى.
بۇل كۇنى وماندا جوعارى دەڭگەيلى يادرولىق كەلىسسوزدەردىڭ ءۇشىنشى راۋندى وتەدى.
- سارسەنبى كۇنى ەكى تاراپ اراسىندا ءوتۋى ءتيىس بولعان ەكى ەلدىڭ تەحنيكالىق كونسۋلتاتيۆتىك كەزدەسۋى سەنبىگە اۋىستىرىلدى، - دەدى يران سىرتقى ىستەر مينيسترلىگىنىڭ باسپا ءسوز حاتشىسى ەسمايل باگاي.
ونىڭ ايتۋىنشا، كەزدەسۋدى كەيىنگە قالدىرۋ تۋرالى شەشىم «وماننىڭ ۇسىنىسى بويىنشا جانە يران مەن امەريكا دەلەگاتسيالارىنىڭ كەلىسىمىمەن» قابىلدانعان. تەحنيكالىق كەڭەستىڭ كەيىنگە شەگەرىلۋ سەبەبى ازىرگە بەلگىسىز.
12-ساۋىردەن بەرى تەگەران مەن ۆاشينگتون وماننىڭ قاتىسۋىمەن ماسكات پەن ريمدە جاناما كەلىسسوزدەردىڭ ەكى كەزەڭىن وتكىزدى. كەلىسسوزدەرگە يران سىرتقى ىستەر ءمينيسترى ابباس اراكچي مەن ا ق ش- تىڭ تاياۋ شىعىس بويىنشا ارنايى وكىلى ستيۆ ۋيتكوفف جەتەكشىلىك ەتتى.
ريمدە وتكەن كەلىسسوزدەردىڭ ەكىنشى راۋندى بارىسىندا تاراپتار يادرولىق كەلىسىم بويىنشا نەگىزگى كەلىسىمدى ازىرلەۋگە كىرىسۋگە كەلىستى.
كەيىنگى كۇندەرى يران-امەريكا يادرولىق كەلىسسوزدەرىنە قاتىستى ديپلوماتيالىق شايقاستار قارقىندى تۇردە جالعاسىپ جاتىر.
سەيسەنبى كۇنى ومان باسشىسى سۇلتان حايتام بين تاريك ءال سايد رەسەيگە بارىپ، رەسەي پرەزيدەنتى ۆلاديمير پۋتينمەن يراننىڭ يادرولىق باعدارلاماسىن تالقىلادى.
رەسەي پرەزيدەنتىنىڭ سىرتقى ساياسات جونىندەگى كومەكشىسى يۋري ۋشاكوۆتىڭ ايتۋىنشا، ەكى تاراپ «يران مەن امەريكا وكىلدەرى اراسىنداعى كەلىسسوزدەردىڭ بارىسى تۋرالى» تالقىلادى.
سونىمەن قاتار ا ق ش پرەزيدەنتى دونالد ترامپ يزرايل پرەمەر-ءمينيسترى بينيامين نەتانياحۋمەن تەلەفون ارقىلى سويلەسىپ، يرانمەن يادرولىق كەلىسسوزدەر، سونداي-اق گازا سەكتورىنداعى اتىستى توقتاتۋ جانە كەپىلگە الىنعانداردى بوساتۋ تۋرالى كەلىسىمدى تالقىلادى. بۇل تۋرالى Axios جازدى.
- تەلەفون ارقىلى سويلەسۋىمىز ويداعىداي ءوتتى. بارلىق ماسەلەدە ويىمىز ءبىر جەردەن شىقتى، - دەدى ترامپ الەۋمەتتىك جەلىدەگى جازباسىندا.
بۇعان دەيىن ماگاتە يران مەن اقش اراسىنداعى يادرولىق كەلىسسوزدەردى قالپىنا كەلتىرۋگە جاردەمدەسۋگە دايىن ەكەنى حابارلانعان بولاتىن.
ترامپ مامىر ايىندا ساۋد ارابياسى، قاتار جانە ب ا ءا- گە بارۋ جوسپارىن مالىمدەدى.
