يران ەكى اپتالىق بىتىمگە كەلىستى: كەلىسسوزدەر يسلامابادتا باستالادى

استانا. KAZINFORM - تاياۋ شىعىستاعى شيەلەنىستى ديپلوماتيالىق جولمەن رەتتەۋگە باعىتتالعان ماڭىزدى قادام جاسالدى. ا ق ش پرەزيدەنتى دونالد ترامپ يرانعا سوققىلاردى ۋاقىتشا توقتاتۋعا دايىن ەكەنىن مالىمدەگەننەن كەيىن، رەسمي تەگەران ەكى اپتالىق ءبىتىم شارتتارىن قابىلدادى. تاراپتار اراسىنداعى كەلىسسوزدەر جۇما كۇنى يسلامابادتا باستالماق. بۇل تۋرالى Al Jazeera ارناسى حابارلادى.

ا ق ش تاراپى يرانعا قارسى سوققىلاردى ۋاقىتشا توقتاتۋعا دايىن ەكەنىن، الايدا ونىڭ باستى شارتى - ورمۋز بۇعازىنىڭ تولىق ءارى قاۋىپسىز اشىلۋى ەكەنىن مالىمدەگەن ەدى.

يران سىرتقى ىستەر ءمينيسترى الداعى ەكى اپتا ىشىندە بۇعاز ارقىلى كەمەلەردىڭ قاۋىپسىز ءوتۋى ەلدىڭ قارۋلى كۇشتەرىمەن ۇيلەستىرىلە وتىرىپ قامتاماسىز ەتىلەتىنىن حابارلادى.

ترامپتىڭ بۇل مالىمدەمەسى پاكىستان پرەمەر-ءمينيسترى شەحباز شاريفتىڭ وتىنىشىنەن كەيىن جاسالدى. ول ا ق ش پرەزيدەنتىنەن كەلىسىمگە كەلۋ مەرزىمىن ۇزارتۋدى سۇراپ، يراندى ورمۋز بۇعازىن تولىق اشۋعا شاقىرعان.

الدىن الا مالىمەتتەرگە سايكەس، كەلىسسوزدەردىڭ العاشقى كەزەڭى جۇما كۇنى يسلامابادتا وتەدى. ساراپشىلار بۇل قادام ايماقتاعى اسكەري شيەلەنىستى باسەڭدەتۋگە جانە الەمدىك ەنەرگەتيكالىق نارىقتاعى تۇراقسىزدىقتى ازايتۋعا ىقپال ەتۋى مۇمكىن ەكەنىن ايتادى.

ورمۋز بۇعازى الەمدىك مۇناي تاسىمالى ءۇشىن ستراتەگيالىق ماڭىزعا يە. الەمدەگى مۇناي جەتكىزىلىمىنىڭ شامامەن بەستەن ءبىرى وسى باعىت ارقىلى وتەتىندىكتەن، ونىڭ قايتا اشىلۋى حالىقارالىق نارىققا تىكەلەي اسەر ەتەدى.

ايتا كەتەيىك، بۇعان دەيىن ترامپ يراننىڭ ەنەرگەتيكالىق ينفراقۇرىلىمىنا سوققى جاساۋدى ەكى اپتاعا شەگەرگەنىن جازدىق.

ال وسى جاڭالىقتان كەيىن مۇناي باعاسى كۇرت تومەندەدى.

اۆتور

جاسۇلان باقىتبەك ۇلى