يران داعدارىسى ا ق ش سەناتىنداعى داۋ-دامايدىڭ تاساسىندا قالدى

استانا. KAZINFORM - ا ق ش قورعانىس ءمينيسترى پيت حەگسەتتىڭ قاتىسۋىمەن بولعان سەناتتاعى تىڭداۋلار بارىسىندا امەريكالىق اسكەردى ا ق ش ىشىندە پايدالانۋعا قاتىستى كەلىسپەۋشىلىكتەر تۋىندادى، دەپ حابارلايدى The New York Times.

پرەزيدەنت دونالد ترامپ يران باسشىلىعىنان كاپيتۋلياتسيانى تالاپ ەتىپ وتىرعاندا سەناتورلار اكىمشىلىكتى ارميانى ساياسيلاندىردى جانە قارۋلى كۇشتەردىڭ يميدجىنە نۇقسان كەلتىردى دەپ ايىپتادى.

قارۋلى كۇشتەر كوميتەتىندەگى قورعانىس بيۋدجەتى تۋرالى تىڭداۋلار كەزىندە دەموكراتتار ترامپتىڭ مەملەكەتتىك جانە جەرگىلىكتى كوشباسشىلاردىڭ قارسى بولۋىنا قاراماستان تەڭىز جاياۋ اسكەرلەرى مەن ۇلتتىق گۆارديانى لوس-اندجەلەسكە ورنالاستىرۋى ارميانى ءوزى قورعاۋى ءتيىس ازاماتتارعا قارسى قوياتىنىن ايتىپ، شاعىمداندى.

- مەنىڭ پارتيالاس ارىپتەستەرىم، اسىرەسە اسكەردە بولعاندار ساياسي ىستەرگە ارالاسپايتىن ارميانى قالىپتاستىرۋعا تىرىسۋى كەرەك، ازاماتتار وزدەرىنىڭ اسكەرىنەن قورىقپاۋى ءتيىس، - دەدى ميچيگاننان سايلانعان دەموكرات ەليسسا سلوتكين.

رەسپۋبليكالىقتار بۇرىنعى پرەزيدەنت دجو بايدەننىڭ ساياساتى ترانسگەندەر سولداتتارعا اشىق قىزمەت ەتىپ، ولاردىڭ ابورت جاساتۋىن قارجىلاندىرىپ، ايتارلىقتاي شىعىن كەلتىردى، دەپ قارسى شىقتى.

- ءبىز ءتورت جىلدا ارميانىڭ تۋرا وسىلاي ساياسيلاندىرىلعانىنان ەشقاشان كورگەن ەمەسپىز، - دەدى ينديانادان سايلانعان سەناتور دجيم بەنكس.

ترامپ سارسەنبى كۇنى امەريكالىق اسكەرگە يراننىڭ يادرولىق رەاكتورلارىنا شابۋىلداۋعا بۇيرىق بەرە مە جانە يزريالدىڭ سوعىسىنا قاتىسا ما؟ دەگەن ساۋالعا تىكەلەي جاۋاپ بەرۋدەن باس تارتتى.

- مەن مۇنى ىستەي الامىن، مەن مۇنى ىستەمەۋىم دە مۇمكىن. ايتايىن دەگەنىم، مەنىڭ نە ىستەيتىنىمدى ەشكىم بىلمەيدى، - دەدى دونالد ترامپ.

سەناتتاعى تىڭداۋ دەموكراتتار مەن رەسپۋبليكاشىلدار اراسىنداعى اسكەردى قالاي جانە قاشان قولدانۋ كەرەكتىگى تۋرالى تاعى ءبىر كەلىسپەۋشىلىككە نەگىز بولدى.

حەگسەت: «مەن وكرۋگ سوتتارى ۇلتتىق قاۋىپسىزدىك ساياساتىن انىقتاۋى كەرەك دەپ ەسەپتەمەيمىن»، دەدى. الايدا ول جوعارعى سوتتىڭ شەشىمىنە قۇرمەتپەن قارايتىنىن ايتتى.

حەگسەت يرانعا سوققى جاساۋ، يزرايلدىكتەرگە يراننىڭ يادرولىق الەۋەتىن جويۋعا كومەكتەسۋ بويىنشا پرەزيدەنت ءۇشىن باسقا دا مۇمكىندىكتەردى قاراستىرىپ وتىرسىز با، دەگەن ساۋالدان جالتارىپ كەتتى.

- قورعانىس مينيسترلىگىندەگى ءبىزدىڭ ماقساتىمىز دايىن بولۋ جانە مۇمكىندىكتەردى قاراستىرۋ. ءبىز ءدال وسىلاي ىستەپ جاتىرمىز، - دەدى پيت حەگسەت.

لوس-انجەلەسكە تاعى 2000 اسكەر جىبەرىلگەنى بۇعان دەيىن حابارلانعان. سونىمەن قاتار، رەسپۋبليكاندىقتار مەن دەموكراتتاردىڭ كونگرەس توپتارى تاياۋ شىعىستا سوعىس باستاماس بۇرىن ترامپ اكىمشىلىگىنەن كونگرەستىڭ ماقۇلداۋىن الۋدى تالاپ ەتەتىن قارار قابىلداۋدى جوسپارلاپ وتىر.

اۆتور

ەركەجان سماعۇلوۆا