يران ارمياسى تەل-اۆيۆتەگى اۋداننان ەۆاكۋاتسيا جۇرگىزۋدى تالاپ ەتتى

استانا. KAZINFORM - يزرايل تەگەرانداعى ءبىر اۋداننان ەۆاكۋاتسيا تۋرالى ەسكەرتۋ جاساعاننان كەيىن، يران ارمياسى دا تەل-اۆيۆتەگى نيەۆە- تسەدەك اۋدانىن ەۆاكۋاتسيالاۋ تۋرالى ەسكەرتۋ جاسادى، دەپ حابارلايدى انادولى.

يران ارمياسىنىڭ مالىمدەمەسىندە تەل-اۆيۆ قالاسىنداعى «سيونيستىك قونىس» سانالاتىن نيەۆە-سەدەك اۋدانىن ەۆاكۋاتسيالاۋ قاجەتتىگى ايتىلعان.

- وككۋپاتسيالىق كۇشتەر بۇل باسىپ الىنعان اۋماقتى دەرەۋ تاستاپ كەتۋى كەرەك، - دەلىنگەن حابارلامادا.

بۇعان دەيىن يزرايل ارمياسى تەگەراننىڭ وڭتۇستىگىندەگى 18 اۋدانعا ەسكەرتۋ جاريالاپ، بۇل ايماققا شابۋىل جاسالاتىنىن مالىمدەگەن ەدى.

قاقتىعىس يزرايلدىڭ يرانعا جاپپاي سوققى بەرۋىنەن باستالدى.

13- ماۋسىمدا يزرايل يران رەسپۋبليكاسىنىڭ ءارتۇرلى قالالارىندا ورنالاسقان يادرولىق نىساندار مەن ەلدىڭ جوعارى اسكەري باسشىلىعىنا قارسى اۋقىمدى سوققىلار جاسادى.

شابۋىلدار سالدارىنان يران قارۋلى كۇشتەرى باس شتابىنىڭ باستىعى، يسلام رەۆوليۋتسياسى ساقشىلارى كورپۋسىنىڭ باس قولباسشىسى، بىرنەشە جوعارى شەندى اسكەري قىزمەتكەرلەر، سونداي-اق يادرولىق زەرتتەۋلەرمەن اينالىساتىن توعىز يراندىق مامان قازا تاپتى. ازاماتتىق حالىق اراسىندا قازا تاپقاندار سانى 224 ادامعا جەتتى.

جاۋاپ رەتىندە يران يزرايل اۋماعىنا بالليستيكالىق زىمىراندارمەن سوققى جاسادى. رەسمي مالىمەت بويىنشا، بۇل شابۋىلداردان 24 ادام قازا تاۋىپ، 500 دەن استام ادام جارالانعان.

تۇركيانى قوسا العاندا، ءبىرقاتار ەل يزرايلدىڭ ارەكەتىن قاتاڭ ايىپتادى.

ايتا كەتەلىك كونگرەسمەندەر ترامپتىڭ يزرايل-يران قاقتىعىسىنا ارالاسۋ وكىلەتتىگىن شەكتەۋگە تىرىسىپ وتىرعانى تۋرالى جازعان ەدىك.

اۆتور

نازىم بولەسوۆا